ខេត្តព្រះសីហនុ ៖ សិស្សស្ទាវ៣នាក់ដែលប្រជាពលរដ្ឋនៅក្រុងព្រះសីហនុតែងតែឃើញបង្ហោះម៉ូតូនៅតាមដងវិថីនា នាយ៉ាងអនាធិបតេយ្យនោះបានជួបគ្រោះថ្នាក់ចរាចរណ៍បណ្តាលឱ្យម្នាក់បាក់កស្លាប់នៅនឹងកន្លែង និង២នាក់ទៀតរងរបួសសល់តែដង្ហើមចង្រិតត្រូវរថយន្តសង្គ្រោះដឹកយកទៅកាន់គ្លីនិកឯកជនមួយ ដើម្បីសង្គ្រោះ ។ លោកកេត សុភ័ក្ត្រ នាយរងការិយាល័យចរាចរណ៍ផ្លូវគោកឱ្យដឹងថា សិស្សម្នាក់ដែលរងគ្រោះរហូតដល់បាត់បង់ជីវិតឈ្មោះផល សុធា អាយុ១៦ឆ្នាំ មានទីលំនៅក្នុងភូមិដូង សង្កាត់លេខ៤ ក្រុងព្រះសីហនុ ជាអ្នកបើកម៉ូតូម៉ាកហ្វ៊ីណូ គ្មានស្លាកលេខ ។ សិស្សម្នាក់នេះស្លាប់ដោយសារបាក់កនិងបាក់ដៃជើង ។ ចំណែកសិស្ស២នាក់ទៀតដែលរងរបួសឈ្មោះចេង សំណាង អាយុ១៧ឆ្នាំ និងឈ្មោះឈួន អាយុ១៧ឆ្នាំ មានទីលំនៅក្នុងភូមិ៥ សង្កាត់លេខ៤ ក្រុងព្រះសីហនុ ។
លោកកេត សុភ័ក្ត្រ បន្តទៀតថា គ្រោះថ្នាក់ចរាចរណ៍នេះកើតឡើងនៅតាមបណ្តោយវិថី២ ធ្នូ ត្រង់ចំណុចផ្លូវកោងទល់មុខភោជនីយដ្ឋាន-ផ្ទះសំណាក់យីហោឆេស ក្លូដ ស្ថិតក្នុងភូមិ១ សង្កាត់លេខ៣ ក្រុងព្រះសីហនុវេលាម៉ោង៩ និង៣០នាទីថ្ងៃទី១៩ ធ្នូ ។ សាក្សីដែលឃើញហេតុការណ៍និយាយថា សិស្សសាលាជាច្រើននាក់បានបើកម៉ូតូទន្ទឹមគ្នាបោះពួយយ៉ាងលឿនតាមទិសដៅពីលិចទៅកើត ហើយហ៊ោកញ្ជ្រៀវខ្លះបង្ហោះម៉ូតូ ខ្លះទៀតបើកប្រជែងគ្នា លុះដល់ចំណុចផ្លូវកោងដោយសារល្បឿនម៉ូតូលឿនពេកអ្នកបើកម៉ូតូមួយគ្រឿងបាត់ស្មារតី ក៏ជ្រុលចង្កូតទៅបុកបង្គោលភ្លើងបណ្តាលឱ្យបាក់កស្លាប់នៅនឹងកន្លែង ឯ២នាក់ទៀតរបួសជាទំងន់ ៕