ខេត្តបន្ទាយមានជ័យ ៖ បុរសម្នាក់បានត្រូវរថយន្តបុកបណ្តាលឱ្យស្លាប់នៅកណ្តាលផ្លូវយ៉ាងអាណោចអាធ័ម និងត្រូវបានគេប្រទះឃើញកាលពីវេលាម៉ោង៨យប់ថ្ងៃទី២៣ ធ្នូ ឆ្នាំ២០១០ នៅលើផ្លូវជាតិលេខ៦ ត្រង់ចំណុចចន្លោះបង្គោលភ្លើងលេខ SKL 04-05 ចំងាយពីភូមិរហាល ឃុំរហាល ស្រុកព្រះនេត្រព្រះ ប្រហែល១.០០០ម៉ែត្រ។ លោកអនុសេនីយ៍ឯកកែវ ប៊ុនយឿន អធិការនគរបាលស្រុកព្រះនេត្រព្រះបានឱ្យដឹងថា សពជនរងគ្រោះមិនត្រូវបានគេស្គាល់អត្តសញ្ញាណឡើយ ហើយពេលវេលានៃគ្រោះថ្នាក់នោះក៏មិនដឹងជាម៉ោងប៉ុន្មានដែរ ។
សមត្ថកិច្ចបានទទួលព័ត៌មានពីប្រជាពលរដ្ឋនៅវេលាម៉ោង៨យប់ថា មានមនុស្សស្លាប់កណ្តាលផ្លូវ ហើយលោកបានចាត់កំលាំងជំនាញឱ្យចុះទៅពិនិត្យទើបដឹងថា ការស្លាប់របស់ជនរងគ្រោះ គឺដោយសារត្រូវរថយន្តបុក និងកិនទើបបណ្តាលឱ្យខ្លួនប្រាណសពបាក់ខ្ទេចខ្ទីជាច្រើនកំណាត់ ។ បើតាមការសន្និដ្ឋានគឺជារថយន្តផ្ទុកទំនិញប្រភេទធ្ងន់ដែល ក្រោយពីបុកហើយ ក៏បានបើកគេចបាត់ស្រមោល ។
លោកអធិការនគរបាលស្រុកបានឱ្យដឹងទៀតថា បើតាមប្រភពព័ត៌មានពីប្រជាពលរដ្ឋគឺបុរសរងគ្រោះជាមនុស្សវិកលចរិតពីព្រោះធ្លាប់ដើរសុំបាយព ួកគាត់នៅកន្លែងច្រូតស្រូវហូបលុះពេលហូបរួចដើរត្រាច់ចរគ្មានគោលដៅ ។ លោកអធិការបញ្ជាក់ថា ដោយសពជនរងគ្រោះមិនអាចទុកយូរបាន លោកក៏បានឱ្យនាយប៉ុសិ៍្ត និងមេភូមិចាត់ចែងបូជានៅវត្តរហាល ហើយតំកល់ធាតុទុក និងស្រាវជ្រាវរកសាច់ញាតិមកយកទៅធ្វើបុណ្យតាមប្រពៃណី ៕