រាជធានីភ្នំពេញ ៖ យោងតាមមន្ត្រីដែលស្និទ្ធនឹងតុលាការរាជធានីភ្នំពេញបានឱ្យដឹងថា អ្នកកាសែត២នាក់ដែលក្លែងបន្លំស្ថាប័នអាជ្ញាធរអគ្គិសនីយកឈ្មោះមន្ត្រីថ្នាក់លើទៅគំរាមជំរិ តទារប្រាក់ពីមន្ត្រីអគ្គិសនីថ្នាក់ក្រោម (អ្នកម៉ៅការ) ហើយត្រូវព្រះរាជអាជ្ញារងប្លង់ សុផល សាកសួរដដែលៗរយៈពេល៣ថ្ងៃមកនេះ ត្រូវបានធ្វើការចោទប្រកាន់រួចហើយកាលពីព្រឹកថ្ងៃទី២៤ ធ្នូ ២០១០ ពីបទឆបោក ហើយប្រគល់សំណុំរឿងទៅឱ្យលោកចៅក្រមធ្វើការស៊ើបអង្កេត។ មន្ត្រីដែលស្និទ្ធនឹងតុលាការបានឱ្យដឹងទៀតថា បន្ទាប់ពីព្រះរាជអាជ្ញារងប្លង់ សុផល ធ្វើការចោទប្រកាន់រួចមក លោកចៅក្រមក៏បានចេញដីកាឃុំខ្លួនអ្នកកាសែតទាំង២នាក់នោះផងដែរ ប៉ុន្តែមិនបានប្រគល់ និងបញ្ជូនទៅពន្ធនាគារព្រៃ.សភ្លាមៗទេ ដោយហេតុថា ដល់ម៉ោងបាយថ្ងៃត្រង់ជាម៉ោងសំរាក ដូច្នេះរង់ចាំដល់ម៉ោង៣និង៣០នាទីរសៀលថ្ងៃទី២៤ ធ្នូ ដដែលនេះ ខាងប៉ូលិសព្រហ្មទណ្ឌខណ្ឌសែនសុខ នឹងដឹកអ្នកកាសែតទាំង២នេះមកកាន់តុលាការម្តងទៀត ដើម្បីទទួលយកដីកាឃុំខ្លួនពីលោកចៅក្រម រួចហើយបញ្ជូនទៅកាន់ពន្ធនាគារព្រៃ.សតែម្តង។ វាសនាអ្នកកាសែតទាំង២នេះអាចជាប់ឃុំនៅពន្ធនាគារព្រៃ.សបណ្តោះអាសន្នពី៣ទៅ៦ខែ ទើបចៅក្រមហៅមកបើកសវនាការជំនុំជំរះ។
ការដែលអ្នកកាសែតទាំង២នេះត្រូវបានឃាត់ខ្លួន និងបញ្ជូនចុះឡើងៗទៅតុលាការនោះ មិនមែនមានន័យថា ត្រូវបានចោទប្រកាន់ពីបទជំរិតប្រាក់ពី១០០ទៅ២០០ដុល្លារនោះទេ តែគឺជាបទល្មើសព្រហ្មទណ្ឌក្លែងឈ្មោះស្ថាប័ន ក្លែងអង្គភាពអ្នកដទៃត្រូវមានទោសធ្ងន់ជាងបទ ល្មើសក្លែងបន្លំឯកសារទៅទៀត...ឧទាហរណ៍ដូចជាលោកដាំ ច្ឆ័ត្ររីយ៍ និងម្នាក់ទៀត លោកសួស សារឿន ត្រូវបានជាប់គុកព្រៃ.សពីបទក្លែងបន្លំលិខិតស្នាម ឬឯកសារ ត្រូវបានតុលាការចេញដីកាឃុំខ្លួនភ្លាមៗ បន្ទាប់ពីសាកសួរអស់ពេលមួយព្រឹក...ស្រាប់តែអ្នកកាសែតទាំង២នេះមុនដំបូងឮដំណឹង ថា មានវាសនារួចផុតពីការចោទប្រកាន់ និងឃុំឃាំងទៅវិញ ដោយខាងសាច់ញាតិជនជាប់ចោទទៅសំរបសំរួលជាមួយភាគីដើមបណ្តឹង និងមានទំនុកបំរុងលុយកាក់ច្រើនពាន់ដុល្លារ...ចំណែកឯតុលាការរង់ចាំមើលឆ្វេង មើលស្តាំ រួចហើយសំរេចតាមកាលៈទេសៈតែម្តង...ប៉ុន្តែដោយសារខ្យល់បក់មិនស្រួល ទើបខាងតុលាការសំរេចជ្រើសរើសយកភាពត្រឹមត្រូវមកអនុវត្តវិញ។ តុលាការមិនយល់ញាតិឃ្លាតច្បាប់ តាមគំរោងដែលមានមុននេះមួយថ្ងៃនោះទេ។
ប្រសិនបើមានការដោះលែងអ្នកទាំងពីរនេះ ដោយសារប្រាក់២ ឬ៣ពាន់ដុល្លារមែននោះ ក្រុមអ្នកតាមដាន អង្គការសង្គមស៊ីវិលនឹងសំដែងប្រតិកម្មថា ពួកគេនឹងតវ៉ាជាមួយតុលាការ និងធ្វើការសើរើបទល្មើសផ្សេងៗពាក់ព័ន្ធនឹងការក្លែងបន្លំឯកសារដូចជាលោកដាំ ច្ឆ័ត្ររីយ៍ និងលោកសួស សារឿន ជាដើម ដើម្បីឱ្យមានការដោះលែងផងដែរ។ អង្គភាពប្រឆាំងអំពើពុករលួយ ដែលដឹកនាំដោយលោកទេសរដ្ឋមន្ត្រីឱម យ៉ិនទៀង បានប្រកាសរួចហើយថា ការស៊ីសំណូក ឬទទួលប្រាក់ ឬកេងបន្លំប្រាក់ចាប់ពី៥០០រៀលឡើងទៅ គឺចាត់ទុកជាអំពើពុករលួយទាំងអស់... ដូច្នេះប្រសិនបើអ្នកតាមដានរកឃើញថា មន្ត្រីតុលាការទទួលសំណូកលុយកាក់ពីអ្នកកាសែតទាំង២នាក់នេះ ជាថ្នូរនឹងការដោះលែងនោះ គេនឹងជំរុញដាក់ការស៊ើបអង្កេតទាំងនេះទៅអង្គភាពប្រឆាំងអំពើពុករលួយតទៅទៀត ដើម្បីចាប់ខ្លួនមន្ត្រីពុករលួយដូចលោកតុប ច័ន្ទ សេរីវុធ ព្រះរាជអាជ្ញាអមសាលាដំបូងខេត្តពោធិ៍សាត់អញ្ជឹងដែរ។
នៅចំពោះមុខសមត្ថកិច្ច ចាងហ្វាងកាសែតខិលខូចទាំង២នាក់ខាងលើបានឆ្លើយសារភាពថា ខ្លួនបានទូរស័ព្ទសុំលុយពីជនរងគ្រោះពិតប្រាកដមែន។ ក្រោយពីសាកសួររយៈពេលជាង១ម៉ោង ប៉ូលិសបានសំរេចឃុំខ្លួនបណ្តោះអាសន្ននៅអធិការដ្ឋានខណ្ឌសែនសុខ ដោយទទួលបញ្ជាពីព្រះរាជអាជ្ញារងអមសាលាដំបូងរាជធានី។
សូមបញ្ជាក់ថា អ្នកកាសែត២នាក់ ដែលប្រជាពលរដ្ឋទូទាំងប្រទេសស្ទើរតែមិនស្គាល់ឈ្មោះ និងអង្គភាពនេះ បានត្រូវប៉ូលិសព្រហ្មទណ្ឌខណ្ឌសែនសុខ ធ្វើការចាប់ខ្លួនវាយខ្នោះពីបទឆបោក ខណៈជនទាំង២នេះទៅទទួលប្រាក់១០០ដុល្លារ ពីបុរសម្នាក់នៅមុខផ្សារដីហុយ ភូមិរោងចក្រ សង្កាត់ភ្នំពេញថ្មី ខណ្ឌសែនសុខ កាលពីវេលាម៉ោង២និង១០នាទីរសៀលថ្ងៃទី២០ ធ្នូ ២០១០។
អ្នកកាសែតទាំង២នេះគឺ១-ឈ្មោះថោង តារាវុធ ចាងហ្វាងកាសែតនគរសន្តិភាព ស្រុកកំណើតភូមិក្រាំងរអូត ឃុំសំរោង ស្រុកសំរោង ខេត្តតាកែវ បច្ចុប្បន្នស្នាក់នៅភ្នំពេញ ២-ឈ្មោះជុំ ប៊ុនហ៊ាប ចាងហ្វាងកាសែតពន្លឺសេរីភាព មានស្រុកកំណើតភូមិ៦ ឃុំព្រែកតានង់ ស្រុកកោះសូទិន ខេត្តកំពង់ចាម អ្នកទាំងពីរត្រូវបានចោទប្រកាន់ពីបទឆបោក ដោយយកឈ្មោះមន្ត្រីនាយកដ្ឋានអាជ្ញាធរអគ្គិសនីកម្ពុជាទៅប្រើប្រាស់ក្នុងការគំរាមកំហែង ទារប្រាក់ពីមន្ត្រីអាជ្ញាធរអគ្គិសនីដែលរស់នៅក្នុងខណ្ឌសែនសុខ។
មន្ត្រីប៉ូលិសបានឱ្យដឹងថា អ្នកទាំង២នេះបានក្លែងឈ្មោះ និងអង្គភាពជាមន្ត្រីនាយកដ្ឋានអាជ្ញាធរអគ្គិសនីកម្ពុជាទៅគំរាមជំរិតទារប្រាក់ពី មន្ត្រីអាជ្ញាធរអគ្គិសនីចំនួន២០០ដុល្លារ ប៉ុន្តែមន្ត្រីនោះបានយល់ព្រមប្រគល់ប្រាក់តែ១០០ដុល្លារប៉ុណ្ណោះ ហើយបានប្តឹងប៉ូលិសទុកជាមុន និងប្រគល់ភារកិច្ចនេះឱ្យប៉ូលិសរៀបចំផែនការចាប់ខ្លួនតែម្តង។
ប៉ូលិសបាននិយាយថា អ្នកកាសែតប្រព្រឹត្តខុសវិជ្ជាជីវៈទាំង២នេះត្រូវបានមន្ត្រីនាយកដ្ឋានអាជ្ញាធរអគ្គិសនីកម្ ពុជា តាមស្វែងរកមុខជាយូរខែមកហើយ ក្រោយពីគេប្រឌិតរឿងទៅគំរាមកំហែងមន្ត្រីអគ្គិសនីនៅតាមបណ្តាខេត្តនានាជំរិតទារប្រាក់រា ប់រយដុល្លារ។ បន្ទាប់ពីឃាត់ពួកគេរួចមក មានមន្ត្រីអាជ្ញាធរអគ្គិសនី៤ទៅ៥នាក់ផ្សេងទៀត បានចូលទៅបំភ្លឺប្រាប់សមត្ថកិច្ច និងដាក់ពាក្យបណ្តឹងបន្ថែម ដើម្បីឱ្យតុលាការចាត់ការរឿងនោះទៅតាមស្ថានបទល្មើសរបស់គេ៕