(ផ្លូរីដា)៖ ហេតុការណ៍បាញ់ប្រហារក្លឹបរាត្រីរបស់ ក្រុមមនុស្សស្រឡាញ់ភេទដូចគ្នានៅក្នុងទីក្រុង អូឡាន់ដូ រដ្ឋផ្លូរីដា ភាគខាងត្បូងសហរដ្ឋអាមេរិក បានបណ្តាលឲ្យមនុស្សស្លាប់ពេលនេះ កើនឡើង ដល់ ៥០នាក់ និង ៥៣នាក់ទៀតរងរបួស ដែលពួកគេភាគច្រើនជាមនុស្សស្រឡាញ់ភេទដូចគ្នា តែម្តង។ នេះបើតាមការចេញផ្សាយមុននេះបន្តិច ដោយសារព័ត៌មាន BBC នាយប់ថ្ងៃអាទិត្យ ទី១២ ខែមិថុនា ឆ្នាំ២០១៦។
អភិបាលក្រុង អូឡាន់ដូ លោក Buddy Dyer បានថ្លែងឲ្យដឹងថា ចំនួនមនុស្សស្លាប់ពេលនេះមាន រហូតដល់ ៥០នាក់ហើយ និង ជាង ៥០នាក់ទៀតរងរបួស បន្ទាប់ពីក្លឹបកម្សាន្តឈ្មោះថា Pulse រងការវាយប្រហារដោយខ្មាន់កាំភ្លើងម្នាក់ កាលពីវេលាម៉ោង ២៖០២ នាទីយប់ថ្ងៃសៅរ៍ ស្ថិតនៅជាយក្រុងភាគខាងត្បូង។ បន្ទាប់ពីការចាប់មនុស្សជាច្រើននាក់ជាចំណាប់ខ្មាំង ទើបប៉ូលិស សម្រេចសម្រុកចូលក្លឹបនោះតែម្តងនៅវេលាម៉ោង ៥៖០០នាទីព្រឹក។
គួរបញ្ជាក់ថា ការសម្រេចសម្រុកចូលក្លឹបនោះក៏ព្រោះតែប៉ូលិសមានការភ័យខ្លាចថា ជនសង្ស័យ នឹងបន្តសម្លាប់មនុស្សជាច្រើននាក់ទៀត។ មន្ត្រីប៉ូលិសសហព័ន្ធបានកំណត់អត្តសញ្ញាជនបង្ក នៅនឹងកន្លែងកើតហេតុនោះហើយ គឺរូបគេមានឈ្មោះថា Omar Mateen មកពីតំបន់កំពង់ផែ Lucie នៃរដ្ឋផ្លូរីដា។ សម្រាប់ការស៊ើបអង្កេត រកមូលហេតុនៃការវាយប្រហារនេះ កំពុងតែបន្តធ្វើឡើង ហើយគេក៏សង្ស័យដែរថា ការបាញ់សម្លាប់អ្នកចម្រៀង The Voice វ័យ ២២ឆ្នាំ កាលពីថ្ងៃសុក្រ អាចមានការជាប់ពាក់ព័ន្ធគ្នា ព្រោះវាសុទ្ធតែបានកើតឡើងនៅទីក្រុង អូឡាន់ដូ រដ្ឋផ្លូរីដា។
ព័ត៌មានចុងក្រោយ បានបញ្ជាក់ថា ភ្ញាក់ងារ FBI បានសង្ស័យថានេះជាអំពើភេរវកម្ម។ បច្ចុប្បន្ន មនុស្ស ៤២នាក់កំពុងសម្រាកព្យាបាលនៅមន្ទីរពេទ្យ ហើយដោយឡែកមនុស្ស ៣០នាក់ទៀត ត្រូវបានសង្គ្រោះចេញពីក្លឹបដោយសុវត្ថិភាព៕
ប្រភព ៖ ប៊ីប៊ីស៊ី
ផ្តល់សិទ្ធដោយ ៖ ហ្វ្រេសញូវអាស៊ី