ផលិតផលច្នៃប្រឌិតថ្មីដែល Apple បានដាក់ពាក្យសុំទៅកាន់ USPTO បង្ហាញថា iPhone អនាគតអាចនឹងត្រូវបានបំពាក់ប៊ិច stylus ដូចទៅនឹង iPad Pro។
ថ្មីៗនេះ Apple ទើបតែបានដាក់ពាក្យទៅកាន់ការិយាល័យផ្ដល់ប័ណ្ណប៉ាតង់ និងស្លាកសញ្ញាអាមេរិក (USPTO) ដើម្បីសុំចុះឈ្មោះជាកម្មសិទ្ធិសម្រាប់ផលិតផលច្នៃប្រឌិតថ្មីរបស់ខ្លួនដែលមានឈ្មោះថា Devices and Methods for Manipulating User Interfaces with a Stylus មានន័យថា “ឧបករណ៍ និងវិធីសម្រាប់ប្រើទៅលើអ៊ីនធឺរហ្វេស ដោយប៊ិច Stylus”។ នេះគឺជាផ្នែកបន្ថែមសម្រាប់ឯកសារដែលបានដាក់ទៅកាន់ USPTO កាលពីខែមិថុនា និងកញ្ញា ឆ្នាំទៅ។
តាមការរៀបរាប់ ប៊ិចនេះអាចត្រូវបានប្រើដើម្បីធ្វើការទៅលើអេក្រង់ស្មាតហ្វូន ដូចជា គូរ សរសេរ បម្លាស់ទីកម្មវិធី។ល។ ទន្ទឹមនឹងនេះ ប៊ិចនេះក៏អាចសរសេរ និងគូរ នៅពេលអេក្រង់កំពុងជាប់សោផងដែរ។
ដូច្នេះ បន្ទាប់ពីបំពាក់ប៊ិច stylus Pencil ទៅឱ្យ iPad Pro ក្រុមហ៊ុន Apple អាចនឹងបំពាក់ប៊ិចនេះទៅលើ iPhone ថ្មីរបស់ខ្លួន។ ទំព័រ Phonearena ព្យាករណ៍ថា iPhone 8 ដែលនឹងបង្ហាញខ្លួននៅឆ្នាំក្រោយ នឹងមានរូបរាងប្លែកទាំងស្រុង ដើម្បីរំលឹកខួប១០ឆ្នាំនៃថ្ងៃកំណើតរបស់ iPhone ហើយប៊ិច stylus អាចនឹងត្រូវបំពាក់នៅលើស្មាតហ្វូនថ្មីនេះ។
រូបភាពស្ដីអំពីផលិតផលថ្មីរបស់ Apple ដែលបានដាក់ពាក្យសុំធ្វើជាកម្មសិទ្ធិ
ការបំពាក់ប៊ីច stylus ទៅលើ iPhone របស់ Apple ត្រូវបានគេយល់ថា ដើម្បីបង្កើនសមត្ថភាពប្រកួតប្រជែងជាមួយ Galaxy Note 5 របស់ Samsung។ល។ ប៉ុន្តែ ប្រការនេះអាចនឹងធ្វើឱ្យមនុស្សមួយចំនួនមិនពេញចិត្ត ពិសេសគឺអតីត CEO Steve Jobs ដែលធ្លាប់បង្អាប់ប៊ិចនេះកាលពីគាត់នៅរស់៕
ប្រែសម្រួល ៖ តារាប្រភព ៖ Phonearena