វិធីប្រើប្រាស់ស្មាតហ្វូនដោយសុវត្ថិភាព ចៀសវាងការផ្ទុះឆេះ!

បន្ទាប់ពីមានគ្រោះថ្នាក់ផ្ទុះឆេះ ទាក់ទឹននឹង Samsung Galaxy Note 7 កន្លងមក និងករណីផ្ទុះថ្មរបស់ iPhone មុននេះ បានធ្វើឱ្យមានការភ័យខ្លាចជាខ្លាំងអំពីសុវត្ថិភាពនៅពេលប្រើប្រាស់ស្មាតហ្វូន បើទោះការផ្ទុះឆេះកើតឡើងមិនច្រើនក៏ដោយ ប៉ុន្តែ សុវត្ថិភាពគឺជាចម្បង។

មូលហេតុនៃការផ្ទុះថ្ម?

មូលហេតុនៃការផ្ទុះថ្ម គឺដោយសារការធ្លុះធ្លាយខ្សែភ្លើងដែលអាចបណ្ដាលមកពីអ្នកប្រើប្រាស់ធ្វើឱ្យធ្លាក់ទូរស័ព្ទ។ ស្នាមប្រេះខាងក្នុងថ្មនឹងកើតឡើង បណ្ដាលឱ្យស្ទះចរន្ធភ្លើង និងផ្ទុះឆេះ។ ចំពោះថ្មដែលមានតម្លៃថោកមួយចំនួន មានលាយលំនូវលោហធាតុខាងក្នុង ហើយនៅពេលតភ្ជាប់ជាមួយ “កោសិកាថ្ម” វាក៏អាចនឹងបង្កគ្រោះថ្នាក់បាន។

ក្រៅពីនេះ ករណីផ្ទុះឆេះថ្មមួយចំនួន ក៏ត្រូវបានគេរកឃើញថា បណ្ដាលមកពីកំដៅរបស់ទូរស័ព្ទឡើងខ្ពស់ជាងធម្មតា នាំឱ្យថ្មត្រូវប្រេះ និងផ្ទុះឆេះ។

ធ្វើយ៉ាងណាដើម្បីការពារមិនឱ្យផ្ទុះឆេះ?

១. ឈប់សាកថ្មនៅពេលទូរស័ព្ទឡើងកំដៅខ្លាំង

២. ប្រើប្រាស់ឆ្នាំងសាកថ្មរបស់ក្រុមហ៊ុន (ឆ្នាំងសាកហ្ស៊ីន) និងយកចិត្តទុកដាក់ទៅលើមុខងារសាកថ្មល្បឿនលឿន។

៣. កាត់បន្ថយការសាកថ្មពេលនៅលើគ្រែ ព្រោះថា អ្នកអាចនឹងគេងលក់ ហើយទូរស័ព្ទត្រូវធ្លាក់ទៅក្រោមខ្នើយ បណ្ដាលឱ្យវាឡើងកំដៅខ្លាំង។

៤. មិនត្រូវសាកថ្មនៅកន្លែងក្ដៅពេក ឬមានសំណើមពេក។

៥. នៅពេលឃើញថ្មទូរស័ព្ទ ហាក់ដូចជាប៉ោង ចូរឈប់សាកថ្ម ហើយយកវាទៅកាន់ក្រុមហ៊ុនដើម្បីដោះស្រាយ។ អ្នកមិនត្រូវបោះវាចោលក្នុងធុងសំរាមនោះទេ។

ប្រែសម្រួល ៖ បុត្រាប្រភព ៖ TDGD