កាំជ្រួចមួយដែលបញ្ជូនផ្កាយរណបទូរគមនាគមន៍ឥណ្ឌា GSAT-5P បានផ្ទុះពេលកំពុងហោះហើរកាលពីថ្ងៃទី២៥ ធ្នូ ពេលមានភ្លើងឆាបឆេះ និងផ្សែងហុយចេញបន្ទាប់ពីបាញ់ចេញពីមូលដ្ឋានបាញ់បង្ហោះស្រ៊ីហារីកូតា នាភាគខាងត្បូងឥណ្ឌា ។ នេះជាបរាជ័យលើកទី២ហើយក្នុងឆ្នាំ២០១០ នេះ សំរាប់ទីភ្នាក់ងារអវកាសឥណ្ឌា ISRO ។ យោងតាមប្រធានរបស់ ISRO លោករ៉ាដ ហាគ្រីស្នារ ថា កាំជ្រួចបញ្ជូនបានហោះចេញខុសទិសដៅ៤៧វិនាទី ក្រោយការហោះឡើង ដែលញ៉ាំងឱ្យបាត់បង់ការត្រួតពិនិត្យ ។ មុំនៃការហោះហើរត្រូវបានរីកធំ ដែលប្រការនេះជំរុញឱ្យមានការខិតខំប្រឹងប្រែងកែលំអបន្ថែមទៀត លើរចនាសម្ព័ន្ធរបស់កាំជ្រួច ដែលទីបំផុតបានផ្ទុះបែក ។#កាលពីខែមេសាកន្លងមកនេះ កាំជ្រួចប្រហាក់ប្រហែលគ្នានេះដែរ បានធ្លាក់ក្នុងឈូងសមុទ្របឹងហ្គាល់ ក្រោយបាញ់បង្ហោះមកពីបញ្ហាមេកានីករបស់ទួរប៊ីននៃប្រព័ន្ធជំរុញ ។#ប្រទេសឥណ្ឌាដែលបានបាញ់បង្ហោះផ្កាយរណបជាង៥០ប្រភេទផ្សេងៗចាប់តាំងពីឆ្នាំ១៩៧៥មក ខិតខំរត់តាមពួកមហាអំណាចអវកាសដូចជាសហរដ្ឋអាមេរិក រុស្ស៊ី ចិន និងបារាំងជាដើម ៕