រាជធានីភ្នំពេញ ៖ លោកនាយករដ្ឋមន្ត្រីថៃ អាប់ភីស៊ីត វ៉េចាជីវ៉ា បានកោះប្រជុំជាបន្ទាន់មួយជាមួយប្រធានសន្តិសុខជាតិថៃ ដើម្បីពិភាក្សាលើរបៀបវារៈស្តីពីការចាប់ខ្លួនពលរដ្ឋថៃ៧នាក់ ពីសំណាក់អាជ្ញាធរកម្ពុជាពីបទឆ្លងដែនចូលដីកម្ពុជាដោយខុសច្បាប់...នេះបើតាមគេហទំព័របាងកក ប៉ុស្តិ៍ចេញផ្សាយកាលពីព្រឹកថ្ងៃទី៣០ ធ្នូ ២០១០ ។ លោកឧបនាយករដ្ឋមន្ត្រីស៊ូថេប ធឿកស៊ូបាន់ ដែលទទួលបន្ទុកកិច្ចការសន្តិសុខជាតិថៃ បាននិយាយនៅលើគេហទំព័របាងកកប៉ុស្តិ៍នៅព្រឹកថ្ងៃព្រហស្បតិ៍នេះថា កិច្ចប្រជុំបន្ទាន់នេះ គឺដើម្បីរកមធ្យោបាយអន្តរាគមន៍ឱ្យមានការដោះលែងលោកសមាជិកសភាថៃ ប៉ានិច វីគិតស្រែត មេក្រុមអាវលឿង លោកវីរ៉ា ស៊ុមខ្វាមឃីត ហើយនិងពលរដ្ឋថៃ៥នាក់ផ្សេងទៀត ដែលកំពុងស្ថិតក្នុងដៃអាជ្ញាធរកម្ពុជា និងបានបញ្ជូនទៅកាត់ទោសនៅរាជធានីភ្នំពេញនោះ ។
ពលរដ្ឋសៀមទាំង៧នាក់នេះ ត្រូវបានឃាត់ខ្លួនកាលពីវេលាម៉ោង១០ព្រឹកថ្ងៃទី២៩ ធ្នូ ២០១០ ខណៈពួកគេបានទៅទស្សនកិច្ចក្នុងតំបន់ជំលោះ ហើយចូលទៅក្នុងទឹកដីកម្ពុជាស្ថិតក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។ កិច្ចប្រជុំបន្ទាន់នាព្រឹកនេះ លោកកាស៊ីត ភិរម្យ បានមកកាន់វិមានរដ្ឋាភិបាល ដើម្បីពិភាក្សាជាមួយលោកនាយករដ្ឋមន្ត្រីអាប់ភីស៊ីត វ៉េចាជីវ៉ា និងលោកឧបនាយករដ្ឋមន្ត្រីស៊ូថេប ផងដែរ ។ យ៉ាងណាក៏ដោយ កាលពីថ្ងៃពុធម្សិលមិញ សម្តេចអគ្គមហាសេនាបតីតេជោហ៊ុន សែន បានមានប្រសាសន៍ដោយសង្កត់ធ្ងន់ថា រឿងប្រព្រឹត្តខុសច្បាប់លុកលុយទឹកដីគេនោះ បើទោះជាមានអន្តរាគមន៍សុំឱ្យដោះលែងសមាជិកសភាទាំង២នាក់នេះក៏ដោយ ក៏យើងមិនអាចជួយបានដែរ ព្រោះពួកគេយករឿងខុសមកជាមួយ ។
សម្តេចបញ្ជាក់ទៀតថា ពិតមែនតែអ្នកឯង ជាសមាជិកសភាថៃ ប៉ុន្តែសមាជិកសភាថៃមានអភ័យឯកសិទ្ធិតែនៅក្នុងទឹកដីថៃប៉ុណ្ណោះ អ្នកឯងគ្មានអភ័យឯកសិទ្ធិក្នុងទឹកដីកម្ពុជាទេ អ្នកឯងចូលក្នុងទឹកដីកម្ពុជាខុសច្បាប់ និងនាំរឿងខុសច្បាប់មកជាមួយទៀត ដូច្នេះបន្ទុកកាន់តែធ្ងន់ ហើយ ត្រូវតែឃាត់ខ្លួនកសាងសំណុំរឿងបញ្ជូនទៅតុលាការជំនុំជម្រះតាមនីតិវិធី ។ សម្តេចបន្ថែមទៀតថា រឿងនេះខុសពីជនជាតិថៃ៣នាក់ ដែលយើងបានដោះលែងប៉ុន្មានថ្ងៃមុន អ្នកឯងធ្វើតំណាងរាស្ត្រមិនយល់ច្បាប់ និងមិនស្គាល់ព្រំដែនខ្លួនឯងនៅកន្លែងណានោះវាត្រូវតែស្គាល់រសជាតិគុកព្រៃ.ស ៕