ប្រធានាធិបតីកូដឌីវ័រផុតអាណត្តិ លោកឡូ រ៉ែន ហ្សេបាបូ កាលពីថ្ងៃទី១៨ ធ្នូ បានបញ្ជាឱ្យកងកំលាំងរក្សាសន្តិភាពរបស់អង្គការសហប្រជាជាតិចាកចេញពីប្រទេសខ្លួន មួយថ្ងៃក្រោយពីប្រមុខអ.ស.ប លោកបាន គីមូន បានចេញសេចក្តីថ្លែងការណ៍មួយ អំពាវនាវឱ្យលោកចុះចេញពីតំណែង ។ #ប្រតិកម្មរបស់លោកហ្សេបាបូ ចំពោះសេចក្តីថ្លែងការណ៍របស់លោកបាន គីមូន ធ្វើឡើងជួនពេលគ្នាទៅនឹងការបង្កើនសម្ពាធរបស់រដ្ឋាភិបាលប្រទេសលោកខាងលិច ដែលដាក់លើរូបលោក ។#ដោយឡែកកាលពីប៉ុន្មានថ្ងៃកន្លងមក បណ្តាមេដឹកនាំសហគមន៍អឺរ៉ុប បានគំរាមដាក់ទណ្ឌកម្មប្រឆាំងប្រទេសកូដឌីវ័រ ហើយសហរដ្ឋអាមេរិកបានប្រកាសថា ខ្លួននឹងដាក់ទណ្ឌកម្មប្រឆាំងឥស្សរជនឆ្នើមៗរបស់ប្រទេសកូដឌីវ័រ ជាពិសេសលោកហ្សេបាបូ និងពួកអ្នករួមការងារជាមួយលោកប្រសិនបើលោកហ្សេបាបូ នៅតែបដិសេធមិនព្រមចុះចេញពីតំណែង។#តាមសេចក្តីថ្លែងការណ៍មួយចេញផ្សាយតាមគេហទំព័ររបស ់កងរក្សាសន្តិភាព អ.ស.ប កាលពីថ្ងៃទី១៨ ធ្នូ ថា បុរស៦នាក់ដែលស្លៀកពាក់ឯកសណ្ឋានយោធាធ្វើដំណើរតាមរថយន្តស៊ីវិលបានបាញ់រះទៅលើ កងរក្សាសន្តិភាពអ.ស.ប នៅតំបន់ Serbroko កាលពីរំលងអាធ្រាត្រថ្ងៃទី១៧ ធ្នូ ប៉ុន្តែមិនបណ្តាលឱ្យមានអ្នកស្លាប់ ឬរបួសឡើយ ។#រដ្ឋាភិបាលរបស់លោកហ្សេបាបូ បានចោទប្រកាន់អង្គការសហហប្រជាជាតិពីបទផ្តល់ការឧបត្ថម្ភផ្នែកភស្តុភារដល់ក្រុមជាអតីត ពួកឧទ្ទាមគាំទ្រលោកអាឡាស់សាន អ៊ូអាតារ៉ា ដែលជាគូប្រជែងសំខាន់របស់លោក ។#អគ្គលេខាធិការអង្គការសហប្រជាជាតិ លោកបាន គីមូន ថ្លែងកាលពីថ្ងៃទី១៧ ធ្នូ កន្លងមកថា លោកហ្សេបាបូ មិនអាចអនុញ្ញាតឱ្យតោងអំណាចបានទៀតឡើយ ។ លោកហ្សេបាបូ ស្នើឱ្យកងទ័ពបារាំង ដកចេញពីកូដឌីវ័រដែរ ៕