ក្រុមហ៊ុន Terrafugia ទើបតែបានឧទ្ទេសនាមគម្រោងរថយន្ដហោះ ដែលកំពុងសាកល្បងហោះហើរ ហើយតាមគម្រោង វានឹងត្រូវបានដាក់លក់ក្នុងឆ្នាំ ២០២៣។
ឆ្នាំ ២០០៦ ក្រុមហ៊ុន Terrafugia ត្រូវបានបង្កើតឡើងដោយក្រុមនិស្សិតអាកាសចរណ៍ និងអវកាសរបស់ MIT ដើម្បីធ្វើឱ្យរថយន្ដហោះ ក្លាយជាការពិត។
រថយន្ដហោះ Terrafugia Transition អាចប្រែកាយពីរថយន្ត ទៅជាយន្ដហោះ
Terrafugia Transition ដែលជារថយន្ដហោះដំបូងគេ ត្រូវបានបង្កើតឡើងជាស្ថាពរ នៅឆ្នាំ ២០១៤។ រថយន្តហោះនេះ អាចប្រែកាយពីរថយន្ត ទៅជាយន្ដហោះ។ នៅពេលហោះហើរ Transition អាចហោះបានប្រហែល ១៦១គីឡូម៉ែត្រ/ម៉ោង ហើយហោះហើរបានរយៈចម្ងាយ ៦៤៤គីឡូម៉ែត្រក្នុងមួយលើក។
Carl Dietrich សហស្ថាបនិករបស់ក្រុមហ៊ុន Terrafugia បង្ហើបប្រាប់ទំព័រ Business Insider ថា អ្នកប្រើប្រាស់ត្រូវតែមានលិខិតអនុញ្ញាតដើម្បីបញ្ជាលើរថយន្ដហោះនេះ។ ក្រៅពីនេះ តម្លៃរបស់វា មិនទាន់ត្រូវបានគេបង្ហើបឱ្យដឹងនៅឡើយ។ ប៉ុន្តែ អតិថិជនអាចបញ្ជាទិញជាមុន តាមរយៈគេហទំព័ររបស់ក្រុមហ៊ុន។
តម្លៃរបស់រថយន្ដហោះ Terrafugia Transition មិនទាន់ត្រូវបានបង្កើបឱ្យដឹងនៅឡើយ
ទន្ទឹមនឹងនេះ ក្រុមហ៊ុន Terrafugia ថែមទាំងបង្កឱ្យមានចំណាប់អារម្មណ៍ ជាមួយនឹងម៉ូដែលរថយន្ត TF-X។ វានឹងដំណើរការដូចទៅនឹងរថយន្ដស្វ័យប្រវត្ត កាត់យន្ដហោះ ៖ បើកស្លាប ហោះហើរ និងបិទស្លាប។ TF-X អាចហោះបានរយៈចម្ងាយ ៨០៥គីឡូម៉ែត្រ។
រថយន្តហោះនេះត្រូវបានរចនាឡើងដោយយកលំនាំតាមយន្ដហោះឡើងត្រង់។ អ្នកប្រើប្រាស់គ្រាន់តែស្វែងរកកន្លែងមួយដែលមានទំហំប្រហាក់ប្រហែលនឹងព្រលានវាយថេននីសដើម្បីហោះឡើង។អ្នកបើកបរ គ្រាន់តែប្រាប់ទីតាំង នោះ TF-X នឹងហោះហើរទៅកន្លែងដែលបានស្នើដោយស្វ័យប្រវត្ត។
រថយន្ដហោះ TF-X អាចហោះបានរយៈចម្ងាយ ៨០៥គីឡូម៉ែត្រ
តាមគម្រោង ផលិតផលនេះនឹងត្រូវបានដាក់លក់ ចាប់ពីឆ្នាំ ២០២៣ ដល់ ២០២៥។
ដូចទៅនឹងឧបករណ៍ហោះហើរគ្មានមនុស្សបើកដទៃ រថយន្ដហោះនេះ ក៏ស្ថិតនៅក្នុងគំនាបនៃច្បាប់របស់ FAA ស្ដីអំពីបញ្ហាសុវត្ថិភាព។ យ៉ាងនេះក្ដី FAA ក៏ទើបតែបានអនុញ្ញាតឱ្យ Terrafugia សាកល្បង TF-X នៅលើអាកាសផងដែរ។
ប្រែសម្រួល ៖ បុត្រា