ភ្នំពេញ ៖ រថយន្តដឹកស៊ីម៉ង់ត៍ មួយគ្រឿង បានបើកបុកឃឿន សួនច្បារ នៅគល់ស្ពាន ព្រះមុនីវង្សថ្មី ត្រើយខាងកើត ដើម្បីចៀសវាងគ្រោះថ្នាក់ ដល់អាយុជីវិត របស់អ្នកដំណើរ ព្រោះរថយន្តបើកចុះពី លើស្ពាន ព្រះមុនីវង្សថ្មី ហ្វ្រាំងជាន់មិនស៊ី កាលពីវេលា ម៉ោង១០ និង៣០នាទី ថ្ងៃទី១៤ ខែមិថុនា ឆ្នាំ២០១៣ ស្ថិតក្នុង សង្កាត់ច្បារអំពៅទី១ ខណ្ឌមានជ័យ ។
លោក ពៅ ហួត ចៅសង្កាត់ច្បារអំពៅទី១ ដែលបានឃើញហេតុការណ៍ ផ្ទាល់ភ្នែក បានឲ្យដឹងថា សំណាងល្អហើយ ដែលអ្នកបើកបរ រថយន្តឈ្មោះ ចយ ផេង សុខចិត្តបើករថយន្ត បុកឡើងសួនច្បារ ដើម្បីបញ្ជៀស ពីគ្រោះថ្នាក់បុកអ្នកដំណើរ តាមដងផ្លូវ ដោយសារ រថយន្តហ្វ្រាំងជាន់មិនស៊ីនេះ ។ លោកបន្តថា ករណីនេះ ក៏មិនមែនជាលើកទី១ទេ បើតាមការកត់ សម្គាល់ កន្លងមក រថយន្តដែលដាច់ហ្វ្រាំង ពេលចុះពីចំណោតស្ពាន តែងបុករះ អ្នកដំណើរស្លាប់រដូករណែល ពេលកន្លងមក ។
លោក ទិត ចំរើន ប្រធានផ្នែក ចរាចរ ខណ្ឌមានជ័យ បានឲ្យដឹងថា ក្នុងករណីនេះ បណ្តាលឲ្យ សួនច្បារផ្លូវជាតិលេខ១ រងការខូចខាតបាក់ដើម ផ្កាអស់២ដើម សមត្ថកិច្ចក៏ ឃាត់រថយន្តបង្ក នាំយកទៅកាន់អធិការដ្ឋាន នគរបាលខណ្ឌ ដើម្បីឲ្យម្ចាស់រថយន្ត សងថ្លៃខូចខាត ទ្រព្យសម្បត្តិសាធារណ: របស់រដ្ឋ ។
លោកទិត ចំរើន បានឲ្យដឹងទៀតថា អ្នកបើកបររថយន្តបង្ក ឈ្មោះ ចយ ផេង អាយុ ៣២ឆ្នាំ មុខរបរបើករថយន្តឲ្យក្រុមហ៊ុនលក់ស៊ីម៉ង់ត៍ MPTSG បានដឹកស៊ីម៉ង់ត៍ ចំនួន១០តោន យកទៅដាក់ឲ្យក្រុមហ៊ុនបុរីប៉េង ហ៊ួត នៅភូមិបឹងស្នោ សង្កាត់និរោធ ៕
ផ្តល់សិទ្ធិដោយ៖ ដើមអំពិល