ទូរស័ព្ទថ្លៃបំផុត លើពិភពលោកមានតំលៃ ១៧,៨ លានដុល្លារ

អ្នករចនាម៉ូតជនជាតិអង់គ្លេស លោក Stuart Hughes ដែលល្បីល្បាញខាងផ្នែករចនាម៉ូតបណ្តា ឧបករណ៍ប​ច្ចេកវិទ្យាបែបទំនើបៗ ប្រណិតៗ បានធ្វើការកែច្នៃទូរស័ព្ទ iPhone 5 ដោយមានបំពាក់នូវពេជ្រ ហើយវាមានតំលៃឡើងដល់ ១៧,៨ លានដុល្លារ។ នេះអាចចាត់ទុកបានថា វាជាទូរស័ព្ទដែលមានតំលៃថ្លៃជាងគេបំផុត នៅលើពិភពលោក។

Hughes បានប្រាប់ឲ្យដឹងថា: “ទូរស័ព្ទ iPhone 5 ដែលគាត់កែច្នៃឡើងនេះ មានតំលៃថ្លៃជាងគេលើពិភពលោក”។ គាត់បានប្រើពេលអស់ ៩សប្តាហ៍ដើម្បីកែច្នៃស៊ុមរបស់ iPhone 5 ឡើងវិញដោយប្រើមាស 24K។ ផលិតផលនេះ គឺត្រូវបានធ្វើដោយដៃទាំងស្រុង។ ប៊ូតុង Home របស់ iPhone 5 ត្រូវបានផ្លាស់ប្តូរដោយបំពាក់នូវពេជ្រពណ៌ខ្មៅមួយគ្រាប់ ទម្ងន់ ២៦ ការ៉ាត់(Carat) ហើយផ្នែកស៊ុមនៃតួទូរស័ព្ទ បំពាក់គ្រាប់ពេជ្រពណ៌ស ចំនួន ៦០០ គ្រាប់។ អេក្រង់របស់វា ធ្វើឡើងពីកញ្ចក់ sapphire ដ៏រឹងមាំ, Hughes ចែករំលែកឲ្យដឹង។ ប្រភេទនៃអេក្រង់នេះ មានភាពរឹងមាំជាងច្រើន បើប្រៀបជាមួយកញ្ចក់ Gorilla Glass ដែលបានប្រើនៅលើ iPhone 5ធម្មតា។

ចំណែក Logo របស់ Apple ដែលស្ថិតនៅផ្នែកខាងក្រោយទូរស័ព្ទ ក៏បានបំពាក់នូវគ្រាប់ពេជ្រចំនួន ៥៣គ្រាប់ផងដែរ។ ទូរស័ព្ទនេះ គឺត្រូវបានអ្នកជំនួញជនជាតិចិនម្នាក់ ជាអ្នកកុម្មង់ឲ្យធ្វើ។គាត់ គឺជាអ្នកដែលផ្តល់គ្រាប់ពេជ្រពណ៌ខ្មៅ ដែលបានដាក់នៅប៊ូតុង Home របស់ទូរស័ព្ទនេះ។ដូច្នេះ ចំនួនទឹកប្រាក់ដែលគាត់ត្រូវផ្តល់ឲ្យ Stuart Hughes ក៏មិនដល់តំលៃ ១៧,៨ លានដុល្លារដែលបាននិយាយខាងលើដែរ៕

ដោយ៖ សិលាប្រភព៖ Zng