ព័ត៌មានអន្តរជាតិ ៖ យោងតាមការដកស្រង់ អត្ថបទផ្សាយ ពីគេហទំព័រ សារព័ត៌មានបរទេស cnn កាល ពីវេលា ល្ងាច ម្សិលមិញនេះ បានចេញផ្សាយអោយដឹងថា ចំនួនអ្នកស្លាប់ ដោយសារតែ គ្រោះអគ្គីភ័យ លេបត្របាក់ ផ្សារ Shenzhen នាខេត្ត Guangdong ភាគខាងត្បូង ប្រទេសចិន កាលពីម្សិលមិញេះ បាន កើនឡើងដល់ទៅ ១៦ នាក់ហើយ ខណៈពេលដែល ៥ នាក់ផ្សេងទៀត រងរបួស ធ្ងន់ និងស្រាល ។
បន្ថែមពីលើនេះ បើតាមការអោយដឹង ពីនាយកដ្ឋាន ពន្លត់អគ្គីភ័យជាតិ អះអាងអោយដឹងថា ករណីគ្រោះ អគ្គីភ័យ ឆាបឆេះផ្សារលើកនេះ បានកើតឡើង នៅវេលា ម៉ោង ១ ទាបភ្លឺ ឈានចូល ថ្ងៃពុធ ព្រឹកមិញនេះ។ មិនត្រឹមតែប៉ុណ្ណោះ ប្រភពបញ្ជាក់ បន្ថែមអោយដឹងថា ក្នុងរយៈពេលពីរម៉ោង អគ្គីភ័យ មួយនេះ បានរាល ដាលមានទំហំ ដល់ទៅ ១ ពាន់ម៉ែត្រ ការ៉េ ។ បន្ទាប់ ពីមានការប្រើ ប្រាស់នូវ រថយន្ត អគ្គីភ័យ ២៩ គ្រឿង អម ទៅដោយមន្រ្តី ពន្លត់អគ្គីភ័យ ជាង ១០០ នាក់ផ្សេងទៀត ជាលទ្ធផល អគ្គីភ័យ មួយនេះ ត្រូវបានរំលត់ទៅ វិញ ក្នុងរយៈពេលប៉ុន្មាន ម៉ោងក្រោយ។
ដោយឡែក មកទល់នឹងខណៈនេះ ពុំទាន់មានរបាយការណ៍ ណាមួយ ចេញផ្សាយ បញ្ជាក់អោយដឹង ពី មូលហេតុ ដែលនាំអោយកើត មានឡើងនូវ គ្រោះអគ្គីភ័យលើកនេះ នៅឡើយទេ ។ គួរបញ្ជាក់ផងដែរថា ផ្សារមួយកន្លែងនេះ គឺជាបណ្តុំនៃការលក់ចេញ ទិញចូល ផលិតផល កសិកម្ម បោះដុំ ប្រចាំតំបន់៕
ប្រែសម្រួល ៖ កុសលប្រភព ៖ cnn