មនុស្សយ៉ាងហោចណាស់៤នាក់ បានស្លាប់បាត់បង់ជីវិតនៅពេលជនអត្តឃាតម្នាក់ បើកម៉ូតូរបស់ខ្លួនបង្កប់គ្រឿងផ្ទុះបំបុករថយន្តបឺសមួយគ្រឿងនៅទីក្រុងកាប៊ុល ប្រទេសអាហ្វហ្គានីស្ថាន កាលពីព្រឹកថ្ងៃទី១២ មករា ។ ការវាយប្រហារអត្តឃាតនេះដែលធ្វើឱ្យកក្រើកតំបន់ភាគខាងកើតក្រុងកាប៊ុល ក៏បានបណ្តាលឱ្យមនុស្ស៨នាក់ទៀតរងរបួសផងដែរ ។#ប្រភពសន្តិសុខនិយាយថា រថយន្តបឺសនោះដឹកសមាជិកនៃទីភ្នាក់ងារចារកម្មអាហ្វហ្គានីស្ថាន។# រថយន្តបឺសនោះរួមទាំងរថយន្តឯកជនពី៣ ទៅ៤គ្រឿងទៀតរងការខូចខាតធ្ងន់ធ្ងរដោយសារការផ្ទុះនោះ ។#ទីភ្នាក់ងារសារព័ត៌មានបារាំង AFP បានដកស្រង់សំដីអ្នកនាំពាក្យក្រសួងមហាផ្ទៃអាហ្វហ្គានីស្ថានដែលនិយាយថា ការវាយប្រហារអត្តឃាតនេះកើតឡើងក្បែរក្រសួងមួយ និងការិយាល័យគ្រប់គ្រងដោយក្រុមហ៊ុនបរទេស ។ ក្រោយពីការផ្ទុះកងកំលាំងសន្តិសុខបានបិទតំបន់នោះមិនឱ្យមានការចេញ-ចូល ៕