អតីតប្រធានាធិបតីហៃទី លោក Jean Claude Duvalier កាលពីថ្ងៃទី១៦ មករា បានវិលត្រឡប់ទៅកាន់ទីក្រុងព័រអូប្រាំង រដ្ឋធានីហៃទីវិញ បង្កឱ្យមានការភ្ញាក់ផ្អើលយ៉ាងខ្លាំងក្រោយពីលោករស់នៅនីរទេសអស់រយៈពេលយ៉ាងយូរ មក។ លោក Duvalier ត្រូវបានដកចេញពីតំណែងនៅក្នុងរដ្ឋប្រហារឆ្នាំ១៩៨៦ ហើយភៀសខ្លួនចេញពីប្រទេសទៅរស់នៅក្នុងប្រទេសបារាំង បានទៅដល់ព្រលានយន្តហោះទីក្រុងព័រអូប្រាំង តាមយន្តហោះរបស់ប្រទេសបារាំងមួយគ្រឿង ។ នៅពេលទៅដល់ព្រលានយន្តហោះក្រុងព័រអូប្រាំង លោក Duvalier ត្រូវបានស្វាគមន៍ដោយអ្នកគាំទ្រលោកយ៉ាងច្រើនកុះករ ។#ទោះបីជាបែបណា នៅព្រលានយន្តហោះព័រអូប្រាំង លោក Duvalier មិនបានធ្វើសេចក្តីថ្លែងការណ៍ ឬធ្វើអត្ថាធិប្បាយអ្វីនោះទេ ប៉ុន្តែលោកថ្លែងប្រាប់អ្នកកាសែតថា រូបលោកមកកាន់ហៃទីដើម្បីជួយដោះស្រាយវិបត្តិនយោបាយរបស់ប្រទេសនេះ ។#បច្ចុប្បន្នប្រទេសហៃទីកំពុងប្រឈមមុខនឹងវិបត្តិនយោបាយដោយសារការបោះឆ្នោតជ្រើសរើស ប្រធានាធិបតីជុំទី២ ត្រូវបានពន្យារពេលមិនកំណត់ ព្រោះការចោទប្រកាន់អំពីការក្លែងបន្លំសន្លឹកឆ្នោត ៕
