ចាប់ខ្លួនឧក្រិដ្ឋជនហ្វេសប៊ុក ខណៈបង្ហោះរូបសាកសពប្រពន្ធខ្លួន ក្រោយបាញ់សម្លាប់ ដោយកាំភ្លើង

ព័ត៌មានអន្តរជាតិ ៖ បើតាមការអោយដឹងពីអាជ្ញាធរសហរដ្ឋអាមេរិក ក៏ដូចជា ដកស្រង់សារព័ត៌មានពីគេហទំព័របរទេស  អាស៊ីវ័ន  ដែលទើបតែបានចេញផ្សាយ  កាលពីថ្ងៃព្រហស្បត្តិ៍ម្សិលមិញនេះ អោយដឹងថា   បុរសដែលជាស្វាមីម្នាក់  ត្រូវបានចាប់ឃាត់ខ្លួន  បន្ទាប់ពីបានបាញ់សម្លាប់ភរិយារបស់ខ្លួនឯង និងថតរូបសាកសពទាំងនោះ បង្ហោះចូលទៅក្នុងបណ្តាញទំនាក់ទំនងសង្គមហ្វេសប៊ុក។

គួរបញ្ជាក់ផងដែរថា  ករណីខាងលើនេះ​  បានកើតឡើងនៅឯក្រុងជាប់មាត់សមុទ្រ Miamiរដ្ឋ Florida សហរដ្ឋអាមេរិក។ យ៉ាងណាមិញ ប្រភពសារព័ត៌មានដដែលបន្ថែមថាជនជាប់ចោទខាងលើ  ដែលត្រូវជាស្វាមីនោះ  មានឈ្មោះថា  Derek Medina វ័យ  ៣១ ឆ្នាំ ខណៈពេលដែលស្រ្តីជាភរិយា និងជាជនរងគ្រោះមានឈ្មោះថា Jennifer Alfonso វ័យ ២៦ ឆ្នាំ។

ជាការពិត   ការចាប់ឃាត់ខ្លួនជនជាប់ចោទរូបនេះ  យកទៅមន្ទីរឃុំឃាំងនៅក្នុងតំបន់ពីសំណាក់មន្រ្តីជំនាញអាចធ្វើ់ទៅបាន បន្ទាប់ពីបានប្រទះឃើញរូបភាពអនាមិក ក៏ដូចជា Sta-tus របស់គាត់ នៅលើទំព័រហ្វេសប៊ុក   ដែលមានអត្ថន័យរួមដូចតទៅ ៖   មិត្តទាំងអស់គ្នា ច្បាស់ណាស់ នឹងឃើញមុខខ្ញុំបាទ   នៅលើទំព័រសារព័ត៌មាន  ដោយនឹងមានការកាត់ទោសប្រហារជីវិត ឬក៏អាចជាប់ពន្ធនាគារ  ក៏ព្រោះតែខ្ញុំបាទបានសម្លាប់ភរិយារបស់ខ្លួន  ក្រោយពីនាងពិតបានរំលោភសិទ្ធិខ្ញុំជាខ្លាំង   ខណៈពេលដែលនាងតែងធ្វើទុក្ខទោម្នេញខ្ញុំបាទ ខ្ញុំសង្ឃឹមថាមិត្តរាល់គ្នានិងយល់  ថែរក្សាខ្លួនណាមិត្តទាំងអស់គ្នា ក៏ដូចជាហ្វេសប៊ុក   ។

យ៉ាងណាមិញ បើយោងតាមសម្តីមន្រ្តីប៉ូលីស  អោយដឹងថា ជនរងគ្រោះ បន្ទាប់ពីបានដឹងថា ខ្លួនពិតជាប្រព្រឹត្តិខុសហើយនោះ   គេក៏ចូលខ្លួនទៅសារភាពដោយផ្ទាល់នៅឯអគ្គស្នងការក្រុង South Miami Police Department ។

ផ្ទុយទៅវិញ សារព័ត៌មានក្នុងស្រុក ក៏បានដកស្រង់សម្តីឪពុកជនរងគ្រោះផងដែរ គឺលោក Derek Medina Sr និយាយបញ្ជាក់អោយដឹងថា កូនប្រុសរបស់ខ្លួនបាននិយាយប្រាប់គាត់ថា   ករណីបាញ់សម្លាប់ភរិយារបស់គេនេះ  អាចធ្វើទៅបាន  អំឡុងពេលនៃការកើតឡើងជម្លោះរហូតដល់ការប្រើប្រាស់អំពើហឹង្សា  ក្រោយពីភរិយារូបនោះបានប្រើប្រាស់កាំបិទធ្វើជាអាវុធតតាំង៕

ចងចាំ ៖​ ការប្រើប្រាស់អាវុធខុសច្បាប់ ក៏ដូចជា ប្រព្រឹត្តិបទល្មើស ត្រូវប្រឈមមុខចំពោះមុខច្បាប់៕

ដោយ ៖ រិទ្ធីប្រភព ៖ អាស៊ីវ័ន