អនុរដ្ឋមន្ត្រីក្រសួងផ្លូវដែកចិន លោកវ៉ាង ហ្ស៊ីហ្គោ វាយតំលៃកាលពីថ្ងៃទី១៥ មករា ថា ជនជាតិចិនប្រមាណជា២៣០លាននាក់នឹងធ្វើដំណើរចល័តក្នុងប្រទេសរវាងថ្ងៃទី១៩ ទៅថ្ងៃទី២៧ កុម្ភៈ សំរាប់ពេលវិស្សមកាលឱកាសបុណ្យចូលឆ្នាំថ្មីតាមចន្ទគតិ។ បុណ្យចូលឆ្នាំថ្មីចិនដែលនឹងមកដល់នាថ្ងៃទី៣ កុម្ភៈ ជាឱកាសនៃការធ្វើដំណើរយ៉ាងធំបំផុតប្រចាំឆ្នាំលើពិភពលោក។#ក្នុងសន្និសីទសារព័ត៌មាន មួយ លោកវ៉ាង ហ្ស៊ីហ្គោ បញ្ជាក់ថា អ្នកដំណើរនឹងត្រូវមានច្រើនលើសកាលពីឆ្នាំទៅមិញដល់ទៅ១២,៥%ក្នុងដំណាក់កាលដូចគ្នានេះ។# ពេលសំរាកវិស្សមកាលឱកាសបុណ្យចូលឆ្នាំថ្មីតាមចន្ទគតិបណ្តាពលករ និងនិស្សិតចិនត្រូវធ្វើដំណើរច្រើនកុះករក្នុងទូទាំងប្រទេសទៅជួបជុំសាច់ញាតិគ្រួសារ ។ សំរាប់ពលករមួយចំនួននោះ គឺជាឱកាសតែម្តងគត់ក្នុងមួយឆ្នាំដែលពួកគេអាចទៅជួបជុំសាច់ញាតិ ៕