យោងតាមការសិក្សាមួយចេញផ្សាយកាលពីថ្ងៃទី១៣ មករា ថា ការខូចខាតដោយសារសកម្មភាពចោរសមុទ្រសំរាប់សេដ្ឋកិច្ចពិភពលោកមានប្រមាណជាពី៧ទៅ១២ពាន់លានដ ុល្លារក្នុងមួយឆ្នាំ ។ ពួកចោរសមុទ្រដែលធ្វើសកម្មភាពខ្លាំងតាមផ្លូវនាវាចរណ៍ក្នុងដែនសមុទ្ររបស់សូម៉ាលី ត្រូវបានគេយល់ថា ជាអ្នកទទួលខុសត្រូវលើ៩៥% នៃការខាតបង់ជាសាកល ។ នេះជាការបញ្ជាក់របស់របាយការណ៍មួយរៀបចំដោយអ្នកស្រាវជ្រាវមួយរបស់ ONE EARTH FUTURE FOUNDATION ជាមជ្ឈមណ្ឌលមួយសិក្សា និងវិភាគមានមូលដ្ឋាននៅសហរដ្ឋអាមេរិក ។ សកម្មភាពចោរសមុទ្រដទៃៗទៀត កើតមានក្នុងដែនទឹកនៃឈូងសមុទ្រ ហ្គីណេ និងនៅច្រកសមុទ្រម៉ាឡាកា ចន្លោះឥណ្ឌូណេស៊ី និងម៉ាឡេស៊ី ។ ចាប់តាំងពីឆ្នាំ២០០៦ មកមានការវាយប្រហារប្រមាណជា១.៦០០លើករបស់ពួកចោរសមុទ្រត្រូវបានជំរឿនឃើញក្នុងដែនទឹកនៃ ពិភពលោក បណ្តាលឱ្យមនុស្សស្លាប់យ៉ាងតិច៥៤នាក់។ តំលៃបង់ខាតសរុបត្រូវបន្ថែមប្រាក់លោះសំរាប់ការដោះលែងនាវា និងបណ្តាសមាជិកក្រុមនាវិក ប្រាក់កំរៃទាមទារដោយបណ្តាក្រុមហ៊ុនធានារ៉ាប់រង ការប្តូរផ្លូវធ្វើនាវាចរណ៍ក្នុងសមុទ្រ ការចំណាយខាងកិច្ចការពារសន្តិសុខក្នុងនោះមានការល្បាតរបស់កងនាវាចម្បាំង ព្រមទាំងតំលៃបង់ឱ្យតុលាការ ឬការបង់តំលៃដោយប្រយោលទាំងឡាយ ។#តំលៃសរុបនៃការខាតបង់ដោយសារចោរសមុទ្រមានការកើនឡើងគុណនឹង៥ ចាប់តាំងពីឆ្នាំ២០០៥មក ។ ការបង់ប្រាក់លោះគិតជាមធ្យមត្រឹមតែ១៥០.០០០ដុល្លារប៉ុណ្ណោះក្នុងឆ្នាំ២០០៥ តែក្នុងឆ្នាំ២០១០ ការបង់ប្រាក់លោះមានដល់៥,៤លានដុល្លារ ជាមួយនឹងការបង់ប្រាក់លោះច្រើនកំពូលដល់៩,៥លានដុល្លារ កាលពីខែវិច្ឆិកាកន្លងមកនេះ ជាថ្នូរនឹងការដោះលែងនាវាដឹកប្រេងកូរ៉េខាងត្បូងមួយគ្រឿង ៕