ព័ត៌មានទាក់ទិននឹង Samsung Galaxy Alpha ត្រូវបានបណ្ដាទំព័រសារព័ត៌មានចុះផ្សាយ ជាញឹកញាប់ ក្នុងរយៈពេលប៉ុន្មានសប្ដាហ៍ចុងក្រោយនេះ ហើយមកទល់នឹងបច្ចុប្បន្ន ដំណឹងអំពីគ្រឿងម៉ាស៊ីន ក៏ដូចជាតម្លៃរបស់ស្មាតហ្វូននេះ ក៏ត្រូវបានបង្ហើបឱ្យដឹង។
ស្មាតហ្វូនដែលមានគែមធ្វើអំពីលោហធាតុ ដំបូងរបស់ Samsung ហាក់ជិតដល់ពេលនឹងត្រូវបង្ហាញខ្លួន ព្រោះថា ប៉ុន្មានសប្ដាហ៍ចុងក្រោយនេះ ព័ត៌មានជាច្រើន ស្ដីអំពី Samsung Galaxy Alpha ត្រូវបានគេធ្វើឱ្យបែកធ្លាយ។ ម្យ៉ាងទៀត បើយោងទៅតាមទំព័រ Cnet ដកស្រង់ប្រភពពីកូរ៉េខាងត្បូងដែលស្និទ្ធនឹង Samsung ឱ្យដឹងថា Samsung Galaxy Alpha អាចនឹងបង្ហាញខ្លួន ក្នុងថ្ងៃពុធ សប្ដាហ៍នេះ ពោលគឺថ្ងៃទី ៦ សីហា ឆ្នាំ ២០១៤។
រូបភាពប្រអប់ និងកម្មវិធីរបស់ Samsung Galaxy Alpha
យោងតាមទំព័រ Tecmundo ឱ្យដឹងថា Samsung Galaxy Alpha ប្រើប្រាស់អេក្រង់ 4,7 inch រីសូលូសឹន 720p រួមនឹង ប្រូសេសឺរ Octa-core Exynos 8-core , RAM 2GB, អង្គចងចាំក្នុង 32 GB, កាមេរ៉ាក្រោយ 12MP និងកាមេរ៉ាមុខ 2.1 MP ។ ទន្ទឹមនឹងនេះ Alpha ក៏ត្រូវបានបំពាក់ថ្ម ដែលមានថាមពល 1860 mAh និង Bluetooth 4.0 ។
ផ្ទាំងបដា ឃោសនារបស់ Galaxy Alpha
Galaxy Alpha ក៏មានសេនសឺរសម្រាប់ស្កេនក្រយ៉ាវដៃ ម៉ាស៊ីនដំណើរការដោយប្រព័ន្ធប្រតិបត្តិ Android 4.4 KitKat ។ ទំព័រ Tecmundo ក៏បានឱ្យដឹងថា Galaxy Alpha នឹងត្រូវបានដាក់លក់ ចាប់ពីពាក់កណ្ដាលចុងខែកញ្ញា ឬដើមខែតុលា ក្នុងតម្លៃឡើងដល់ ១០៤៨ ដុល្លារអាមេរិក។
ប្រែសម្រួលដោយ ៖ តារាប្រភព ៖ Geeky-gadgets/Cnet