ភ្នំពេញៈ មន្ត្រីនគរបាលជំនាញ ចរាចរម្នាក់ រងរបួសបាក់ជើងស្តាំម្ខាង និងមន្ត្រីនគរបាលមួយចំនួនទៀត រួមនឹងអង្គភាពរថយន្តសង្គ្រោះ៧១១ កងពលតូចលេខ៧០ បាននាំគ្នារត់បាស់ជើងសព្រាត ភ្នែកនៅកញ្ចឹងក គ្រប់ៗគ្នា ដោយសាររថយន្តកុងតឺន័រ១គ្រឿងខូចនៅចញ្ចើមផ្លូវ ត្រូវនគរបាលសង្កាត់ អន្តរាគមន៍ដោយ ដាក់រនាំដែកចរាចរ និងមែកឈើមួយចំនួនជាកំណត់សម្គាល់ ប៉ុន្តែត្រូវបានម៉ូតូ១គ្រឿង បើកមិនមើលជ្រុលទៅ បុករងរបួសធ្ងន់ ត្រូវបាន នគរបាលជំនាញចរាចរខណ្ឌ ចុះទៅវាស់វែងបានហៅរថយន្ត សង្គ្រោះឲ្យទៅដឹកយក ទៅសង្គ្រោះ ក៏ត្រូវម៉ូតូមួយ គ្រឿងទៀតបើកមកបុកទាំងមន្ត្រីនគរបាល និងក្រុមសង្គ្រោះរត់ចែកជើងគ្នា បណ្តាល ឲ្យមន្ត្រីនគរបាលម្នាក់ បាក់ជើងនៅនឹងកន្លែង។ ត្រូវបានក្រុមសង្គ្រោះដឹកយកទៅកាន់មន្ទីរពេទ្យលោកសង្ឃទាំង អស់។
ហេតុការណ៏ នេះបានកើតឡើង កាលពីវេលាម៉ោង១០និង៤០នាទីយប់ថ្ងៃទី០៨ ខែមិថុនា ឆ្នាំ២០១៣ លើ កំណាត់ផ្លូវជាតិលេខ៤ត្រង់ មុខប៉ុស្តិ៍សង្កាត់កន្ទោក ខ័ណ្ឌពោធិសែនជ័យ។
នគរបាលបានឲ្យដឹងថា ម៉ូតូបង្កទី១ម៉ាកសង់កូរ៉េពណ៏ក្រហមពាក់ស្លាកលេខ ម៤១៥២-ភព១ អ្នកបើកបរស្រវឹង ធ្លាក់ ភ្នែកចង់ដល់ដីមានឈ្មោះ ស៊ិន សំណាង ភេទប្រុស អាយុ៣៥ឆ្នាំ មុខរបរកសិករ រស់នៅភូមិក្រាំងមេត្រី ឃុំស្គុះ ស្រុកសំរោងទង ខេត្តកំពង់ស្ពឺ បើកបរពីកើតទៅលិច រីឯម៉ូតូបង្ករមួយគ្រឿងទៀត ម៉ូតូមួយគ្រឿង ម៉ាក C125 ស៊េរី ២០០៥ ពណ៌ខ្មៅ ពាក់ស្លាកលេខកំពង់ស្ពឺ 1A-6427 បើកបរ ពីកើតទៅលិចអ្នកបើកបរមានឈ្មោះ សួន សិលា ភេទប្រុស អាយុ៥០ឆ្នាំ មុខរបរបុគ្គលិកក្រុមហ៊ុន អេវីហ្រ្គីនអ៊ិនដាស្រ្ទៀល ខូអិលធីឌី ( ក្រុមហ៊ុន ស្រាបៀរ) ស្នាក់នៅភូមិដូនកុក សង្កាត់បឹងធំ ខ័ណ្ឌពោធិសែនជ័យ។
នគរបាលបានបន្តទៀតថា មុនពេលកើតហេតុមានរថយន្តកុងតឺន័រ១គ្រឿង ខូចចតនៅលើ ចិញ្ចើមផ្លូវ ពេល នគរប៉ុស្តិ៍បានជួយរនាំងដែកទៅដាក់ជាស្លាកសញ្ញា និងមែកឈើមួយចំនួនទៀត ដើម្បីឲ្យបើកបរមានការប្រុង ប្រយ័ត្នបន្តិចក្រោយមកក៏មានម៉ូតូ១គ្រឿង ម៉ាកសង់កូរ៉េជិះម្នាក់ឯងក្នុងទិសដៅ ពីកើតទៅលិចក្នុង ស្ថានភាព ស្រវឹងជោគជ្រុលមកបុកពីក្រោយបាយយ៉ាងពេញទំហឹង បណ្តាលឲ្យរងរបួសលើផ្ទៃមុខ បែកក្បាលហូរឈាម ត្រូវបានសមត្ថកិច្ចប៉ុស្តិ៍ហៅជំនាញចរាចរខណ្ឌឲ្យចុះទៅវាស់វែង និងក្រុមសង្គ្រោះអង្គភាព៧១១ នៃកងពលតូច លេខ៧០ ដឹកយកទៅសង្គ្រោះ ប៉ុន្តែខណៈនគរបាល និងក្រុមអង្គភាពសង្គ្រោះ សហការណ៍គ្នា ជួយសង្គ្រោះ និងធ្វើការវាស់វែងនោះ ស្រាប់តែមានម៉ូតូ១គ្រឿងផ្សេងទៀត ម៉ាកសេ១២៥ បើកបរលឿនដូចហោះសំដៅ មកធ្វើឲ្យក្រុម សង្គ្រោះនិងមន្ត្រីនគរបាលរត់ព្រះអាយុយកតែរួចខ្លួនសភ្នែកព្រាត ប៉ុន្តែគួរឲ្យសោកស្តាយ មន្ត្រី នគរបាលម្នាក់រត់ មិនរួចត្រូវម៉ូតូនោះបុកចូលទៅក្រោម កង់រថយន្តរងរបួសបាក់ជើងខាងស្តាំម្ខាង ។ ទើបក្រុម សង្គ្រោះដឹកទាំងនគរបាល និងអ្នកបើកម៉ូតូ បង្កទៅកាន់មន្ទីរពេទ្យព្រះកុសមៈ ហៅមន្ទីរពេទ្យលោកសង្ឃ ទាំងអស់តែម្តងទៅ។ ចំណែកឯវត្ថុតាងត្រូវយកទៅរក្សាទុក នៅចរាចរ និងសណ្តាប់ធ្នាប់ខណ្ឌ ដើម្បីរង់ចាំ ដោះស្រាយគ្នាជាក្រោយ៕
ផ្តល់សិទ្ធិដោយ៖ ដើមអំពិល