អាចម៍ផ្កាយធំមួយ បានផ្ទុះឆេះ នៅពេលវាធ្លាក់ចុះមកផែនដី ធ្វើឱ្យប្រជាជន អេស្ប៉ាញ មានការភ័យខ្លាចជាខ្លាំង ដោយសារមានអ្នកខ្លះ យល់ថា នេះគឺជាយានអវកាសមិនស្គាល់អត្តសញ្ញាណ (UFO) ឬយន្ដហោះមួយគ្រឿង ជួបគ្រោះថ្នាក់។
បណ្ដាញតាមដានអាចម៍ផ្កាយ របស់ អេស្ប៉ាញ បានទទួលស្គាល់ថា អាចម៍ផ្កាយនេះ បានហោះកាត់ពីលើតំបន់ចំនួន ៨ នៅវេលាទាបភ្លឺ ថ្ងៃទី ៧កញ្ញា (នៅអេស្ប៉ាញ) នេះបើតាមសេចក្ដីរាយការណ៍ពី Daily Mail ។ អាចម៍ផ្កាយដែលបានផ្ទុះឆេះនេះ បង្កើតបានជាដុំភ្លើងភ្លឺដ៏ធំមួយ នៅលើអាកាស និងបន្សល់ទុកស្នាមផ្សែងយ៉ាងវែង តាមពីក្រោយ។
អ្នកតារាសាស្ដ្រ Jose Maria Trigo ថ្លែងថា ៖ “យើងខ្ញុំយល់ថា អាចម៍ផ្កាយនេះ អាចនឹងហោះហើរកាត់ទូទាំងប្រទេស ប៉ុន្ដែដោយសារតែតំបន់ជាច្រើន មានមានពពកក្រាស់ ដូច្នេះ ប្រជាជន មិនអាចមើលឃើញ លើកលែងតែតំបន់ Barcelona” ។
ទីភ្នាក់ងារអាកាសធាតុ អេស្ប៉ាញ កំពុងតែពិនិត្យទៅលើវីដេអូដែលប្រជាជនថតបាន រួមនឹងទិន្នន័យវិទ្យាសាស្ដ្រ ដើម្បីកំណត់ឱ្យដឹងថា អាចម៍ផ្កាយនេះ មានប្រភពមកពីណា និងធ្លាក់នៅក្នុងតំបន់ណា។
ទិដ្ឋភាពអាចម៍ផ្កាយធ្លាក់ នៅ អេស្ប៉ាញ
តារាវិទូ Jose Maria Trigo សន្និដ្ឋានថា អាចម៍ផ្កាយនេះ អាចនឹងធ្លាក់នៅក្នុងតំបន់ដាច់ស្រយាល ហើយវាមិនឆេះទាំងស្រុងនោះ ព្រោះថា វាមានទំហំធំគួរសម។ បណ្ដាអាចម៍ផ្កាយ នៅពេលធ្លាក់ចូលមកបរិយាកាសផែនដី វានឹងមានល្បឿនដល់ទៅ ៧៣គីឡូម៉ែត្រ/វិនាទី ដូច្នេះ វានឹងឆេះជាអណ្ដាតភ្លើង ដោយសារតែការកកឹតជាមួយនឹងខ្យល់។
ទន្ទឹមនឹងនេះ អង្គភាពប្រតិកម្មរហ័សនៅតាមតំបន់ ក្នុងប្រទេស អេស្ប៉ាញ ទទួលបានការហៅទូរស័ព្ទជាច្រើន ពីប្រជាជន ក្នុងនោះ មានអ្នកខ្លះយល់ថា វាអាចជា UFO ឬក៏ជាយន្ដហោះដែលជួបគ្រោះថ្នាក់។
ចុងសប្ដាហ៍កន្លង អាចម៍ផ្កាយមួយ ក៏បានធ្លាក់ទៅធ្លាក់ប្រទេស Nicaragua
គួររំលឹកថា មកដល់ពេលនេះ មានករណីចំនួនពីរមកហើយ ទាក់ទិននឹងអាចម៍ផ្កាយ ក្រោយពីអង្គការ NASA ប្រកាសថា មានអាចម៍ផ្កាយមួយធំ កំពុងហោះឆ្ពោះមកកាន់ផែនដី ហើយវានឹងមកកៀកនឹងផែនដីបំផុត ពោលគឺវាហោះជិតផែនដី ជាងផ្កាយរណបទៅទៀត។ ករណិធ្លាក់អាចម៍ផ្កាយមួយផ្សេងទៀត ថ្មីៗនេះ ក៏បានធ្លាក់ទៅលើប្រទេស Nicaragua កាលពីថ្ងៃសៅរ៍កន្លងទៅបណ្ដាលឱ្យមានរណ្ដៅមួយមានទំហំ ១២ម៉ែត្រ៕
ប្រែសម្រួលដោយ ៖ តារាប្រភព ៖ Daily Mail/Youtube