ព័ត៌មានជាតិ ៖ បើយោងតាមសេចក្តីរាយការណ៍ របស់ទំព័រសារព័ត៌មានក្នុងស្រុក ក៏ដូចជា បណ្តាញផ្សព្វផ្សាយព័ត៌មានមួយចំនួនផ្សេងៗទៀត បានបញ្ជាក់អោយដឹងថា ក្នុងអំឡុងកិច្ចប្រជុំកំពូលអាស៊ានលើកទី ២១ និងកិច្ចប្រជុំពាក់ព័ន្ធមួយចំនួនផ្សេងទៀត ខណៈពេលដែលកម្ពុជាធ្វើជាម្ចាស់ផ្ទះនោះ មានអ្នកសារព័ត៌មានមកពីជុំវិញពិភពលោក មិនតិចជាង២០០០ នាក់នោះទេ។
លើសពីនេះទៅទៀត សេចក្តីរាយការណ៍ដដែលនេះ បានបន្ថែមអោយដឹងថា នៅក្នុងនោះអ្នកសារព័ត៌មានជប៉ុនមានចំនួនច្រើនជាងគេ ពោលគឺ ជាប់ចំណាត់ថ្នាក់លេខមួយក្នុងចំណោមអ្នកសារព័ត៌មានមកពីជុំវិញពិភពលោក ដែលមានចំនួនដល់ទៅជាង២០០ នាក់ឯណោះ ស្របពេលដែលអ្នកសារព័ត៌មានមកពីសហរដ្ឋអាមេរិក បានជាប់ចំណាត់ថ្នាក់លេខ ២ មានចំនួនជាង១០០ នាក់ និងអ្នកសារព័ត៌មានចិន បានជាប់ចំណាត់ថ្នាក់លេខ ៣ ។
គួរបញ្ជាក់ផងដែរថា កិច្ចប្រជុំកំពូលអាស៊ានលើកទី ២១ នេះត្រូវបានធ្វើឡើងនៅទីក្រុងភ្នំពេញព្រះរាជាណាចក្រកម្ពុជា ចាប់ពីថ្ងៃទី ១៥ ខែវិច្ឆិកា ដល់ថ្ងៃទី២០ ខែវិច្ឆិកា ឆ្នាំ ២០១២ ។ អំឡុងពេលកិច្ចប្រជុំកំពូលអាស៊ានលើកទី ២១ នេះ ក៏មានកិច្ចប្រជុំពាក់ព័ន្ធមួយចំនួនផ្សេងទៀតផងដែរ ដែលនៅក្នុងនោះរួមមាន ៖ កិច្ចប្រជុំរដ្ឋមន្រ្តីក្រសួងការបរទេសអាស៊ានកិច្ចប្រជុំកំពូលអាស៊ាន-ជប៉ុនលើកទី ១៥ , កិច្ចប្រជុំកំពូលអាស៊ាន បូកបីជាដើម .......... ៕
ដោយ ៖ ពិសិដ្ឋ