ព័ត៌មានជាតិ ៖ ប្រធានាធិបតីអាមេរិក លោកបារ៉ាក់ អូបាម៉ា បានមកដល់ព្រលានយន្តហោះអន្តរជាតិភ្នំពេញហើយ តាមជើងយន្តហោះពិសេសរបស់ប្រធានាធិបតី (Air Force One) កាលពីវេលាម៉ោង ៥ និង ៤៥ នាទីល្ងាចថ្ងៃទី ១៩ វិច្ឆិកា ២០១២ ម្សិលមិញនេះ បន្ទាប់ពីលោកប្រធានាធិបតីរូបនេះបានបញ្ចប់បេសកកម្មដ៏សំខាន់ជាមួយមេដឹកនាំមួយចំនួននៅប្រទេសមីយ៉ាន់ម៉ា និងទទួលស្វាគមន៍ពីលោករដ្ឋមន្ត្រី អ៊ឹម សិទ្ធី ។
គួររំឭកផងដែរថា ប្រព័ន្ធសន្តិសុខត្រូវបានពង្រឹងភ្លាមៗ ដោយកម្លាំងយោធាអាមេរិក សហការជាមួយកម្លាំងប្រដាប់អាវុធរបស់កម្ពុជាមានប៉ូលិស ប៉េអឹម និងកងយោធពលខេមរភូមិន្ទចាប់តាំងពីក្នុងព្រលាន ជុំវិញព្រលាន និងនៅតាមដងមហាវិថីសហព័ន្ធរុស្ស៊ីរហូតមកដល់វិមានសន្តិភាពទីស្តីការនាយករដ្ឋមន្ត្រី កន្លែងដែលបើកកិច្ចប្រជុំកំពូលអាស៊ានលើកទី ២១ ហើយនៅទីនេះ គឺសម្តេចតេជោ ហ៊ុន សែន នាយករដ្ឋមន្ត្រីបានរង់ចាំជាស្រេច ដើម្បីស្វាគមន៍ក្នុងនាមជាប្រធានអាស៊ាន ។
គួរបញ្ជាក់ថា ចាប់ពីវេលាថ្ងៃត្រង់ថ្ងៃទី១៩ វិច្ឆិកា ២០១២ នេះ កំណាត់មហាវិថី, ដងវិថីសំខាន់ៗជាច្រើនកន្លែង ត្រូវបានបិទចរាចរចេញចូលមួយរយៈសិនជាពិសេសដងមហាវិថីសហព័ន្ធរុស្ស៊ីតែម្តង មានសភាពស្ងាត់ជ្រងំ ។ ឯស្ថានីយប្រេងឥន្ធនៈជាច្រើនកន្លែងនៅតាមមហាវិថីដងវិថីសំខាន់ៗ ក៏ត្រូវបានផ្អាកដំណើរការដែរ រហូតបញ្ចប់កិច្ចប្រជុំកំពូលអាស៊ានលើកទី ២១ ខណៈពេលដែលព្រះរាជាណាចក្រកម្ពុជាធ្វើជាម្ចាស់ផ្ទះនេះ៕
ដោយ ៖ រិទ្ធីកែសម្រួលអត្ថបទពី ៖ Kstp