កូរ៉េខាងត្បូង អាមេរិក និងជប៉ុន ត្រៀមធ្វើសមយុទ្ធយោធារួមគ្នា កូរ៉េខាងជើង ព្រមានអាមេរិក

ព័ត៌មានអន្តរជាតិ ៖ កូរ៉េខាងជើង ព្រមានសហរដ្ខអាមេរិក ថានឹងអាចកើតមានឡើងនូវគ្រោះដ៏អាក្រក់មួយដែលនឹកស្មានមិនដល់ ខណៈខ្លួនក៏កំពុងតែត្រៀមទ័ពស្ថិតនៅក្នុងបន្ទាត់ខ្សែក្រហម ស្របពេលដែល អាមេរិក កូរ៉េខាងត្បូង និង ជប៉ុន បម្រុងនឹងធ្វើសមយុទ្ធយោធាជើងទឹករួមគ្នា នេះបើយោងតាមការដកស្រង់អត្ថបទផ្សាយ ពីគេហទំព័រសារព័ត៌មានបរទេស ។

ការព្រមានមួយនេះ ត្រូវបានធ្វើឡើងកាលពីថ្ងៃអង្គារម្សិលមិញនេះ ក្រោយរដ្ឋាភិបាលក្រុងសេអ៊ូល និងរដ្ឋាភិបាលក្រុងវ៉ាស៊ីនតោន កាលពីសប្តាហ៍កន្លងទៅ បានចុះហត្ថលេខាយល់ព្រមធ្វើសមយុទ្ធយោធាជើងទឹករួមគ្នា ស្តីពីយុទ្ធសាស្រ្តថ្មី ក្នុងការធ្វើការប្រឆាំង ក៏ដូចជាគំរាមដល់កូរ៉ខាងជើង ដែលកំពុងតែមានការលូតលាស់ នៅក្នុងការវាយប្រហារអាវុធនុយក្លេអ៊ែរពីសំណាក់ប្រទេសកុម្មុយនីស្តមួយនេះ ក្រោយពីដំណើរការឡើងវិញនូវមូលដ្ឋាននុយក្លេអ៊េរដ៏ចំណាស់មួយ។

គួរបញ្ជាក់ផងដែរ សមយុទ្ធយោធាជើងទឹក ដែលបម្រុងនឹងធ្វើឡើងនៅដែនទឹក ប្រទេសកូរ៉េខាងត្បូងនោះ គ្រោងនឹងចាប់ផ្តើមធ្វើឡើងនៅថ្ងៃអង្គារម្សិលមិញនេះ តែត្រូវបានពន្យាពេល ឬក៏លុបចោលតែម្តងដោយសារតែឥទ្ធិពលនៃខ្បល់ព្យុះទីហ្វុង Danas ក៏កំពុងតែមានវត្តមានរំកិលខ្លួនវាយប្រហារចូលមកតំបន់នេះ។

គួររំឭកផងដែរថា កូរ៉េខាងជើង បានថ្កោលទោសទៅនឹងទម្លាប់នៃការធ្វើសមយុទ្ធយោធារួមគ្នានៅតំបន់នោះ ដោយបានចេញសេចក្តីព្រមានអោយដឹងថា ការវាយប្រហារដ៏កម្រមួយអាចនឹងលេចជារូបរាងឡើង៕