លោកស្រីឌីលម៉ារូសសេហ្វ បានធ្វើសច្ចាប្រណិធានចូលកាន់តំណែងប្រធានាធិបតីថ្មីរបស់ប្រទេសប្រេស៊ីល កាលពីថ្ងៃទី៣១ ធ្នូ កន្លងមក ធ្វើឱ្យលោកស្រីក្លាយជាប្រធានាធិបតីស្ត្រីដំបូងគេរបស់ប្រទេសប្រេស៊ីល ។ លោកស្រី ឌីលម៉ារូសសេហ្វ បានធ្វើសច្ចាប្រណិធាននៅចំពោះមុខអ្នកគាំទ្រយ៉ាងច្រើនកុះករពោរពេញទៅដោយភាពរីករាយ ។#លោកស្រីឌីលម៉ារូសសេហ្វ ថ្លែងថា នេះជាលើកទី១ហើយ ដែលកំណាត់ពាក់ឈៀងតំណែងប្រធានាធិបតីរបស់ប្រេស៊ីលត្រូវបានបំពាក់លើស្មារបស់ស្ត្រី ហើយថា លោកស្រីនឹងគោរពសិទ្ធិស្ត្រីជានិច្ច ជាពិសេសការពារអ្នកដែលងាយរងគ្រោះ ។ លោកស្រីបានថ្លែងទៅកាន់ហ្វូងមនុស្សទាំងទឹកភ្នែកហូររហាម និងពោរពេញទៅដោយភាពត្រេកអរថា «ឥឡូវនេះខ្ញុំជាប្រធានាធិបតី ហើយដូច្នេះអ្នករាល់គ្នាកុំភ័យតទៅទៀត» ។ លោកស្រីឌីលម៉ារូសសេហ្វ អាយុ៦៣ឆ្នាំ បានជំនួសលោកល្វីសអ៊ីណាស៊ីយ៉ូ លូឡាដា ស៊ីលវ៉ា ជាប្រធានាធិបតីដ៏មានប្រជាប្រិយភាពបំផុតរបស់ប្រទេសប្រេស៊ីល ក្រោយពីលោកស្រីទទួលបានជ័យជំនះក្នុងការបោះឆ្នោតជ្រើសរើសប្រធានាធិបតីជុំទី២ កាលពីខែតុលាកន្លងមក ។#ពិធីធ្វើសច្ចាប្រណិធានចូលកាន់តំណែងរបស់លោកស្រីឌីលម៉ារូសសេហ្វ ចូលរួមដោយប្រមុខរដ្ឋ២៣រូប អនុប្រធានាធិបតី៩រូប ឯកអគ្គរដ្ឋទូត៧៦រូប និងរដ្ឋមន្ត្រីការបរទេស២៤រូប ក្នុងនោះមានរដ្ឋមន្ត្រីការបរទេសអាមេរិក លោកស្រីហ៊ីលឡារី គ្លីនតុន ផងដែរ ៕
