នៅប្រទេសកូដឌីវ័រ ដែលមានវិបត្តិនយោបាយក្រោយការបោះឆ្នោតប្រធានាធិបតីជុំទី២ មក ប៉ូលិស៦នាក់បានត្រូវស្លាប់កាលពីថ្ងៃទី១២ មករា ហើយទាហានអ.ស.ប ៣នាក់ត្រូវរបួស។ភាពតឹនតឹងមានការកើនឡើងនៅកូដឌីវ័រ ។ កាលពីថ្ងៃទី១២ មករា អ្នកនាំពាក្យម្នាក់របស់បេសកកម្មអ.ស.ប នៅកូដឌីវ័រ ONUCI រាយការណ៍ថា ទាហានមួកខៀវ អ.ស.ប ៣នាក់ត្រូវរបួសស្រាលនៅទីក្រុង អាប៊ីដ ហ្សាន់ ក្នុងការពួនស្ទាក់វាយប្រហារមួយរបស់កងកំលាំងដែលស្មោះត្រង់នឹងលោកហ្សេបាបូ ។ ការប៉ះទង្គិចគ្នាកើតមាននៅអាបូបូជាសង្កាត់មួយដែលប្រជាជនភាគច្រើនគាំទ្រប្រធានាធិបតី ជាប់ឆ្នោតលោកអាឡាស់សាន អ៊ូអាតារ៉ា ។# ថ្ងៃទី១២ មករា មានការប៉ះទង្គិចគ្នាថ្មីៗផ្ទុះឡើងនៅទីក្រុងអាប៊ីដ ហ្សាន់ រវាងពួកអ្នកគាំទ្រ លោកអ៊ូអាតាវ៉ា និងកងកំលាំងដែលស្មោះត្រង់ចំពោះលោកហ្សេបាបូ ។ ប៉ូលិសយ៉ាងតិច៦នាក់បានត្រូវស្លាប់នៅសង្កាត់អាបូបូ មូលដ្ឋានបង្អែករបស់លោកអ៊ូអាតារ៉ា ក្នុងរដ្ឋធានីកូដឌីវ័រ ។ ប្រជាជនសង្កាត់នោះនិយាយថាបានឃើញរថយន្តប៉ូលិស៤គ្រឿងត្រូវភ្លើងឆេះជាមួយសាកសពប៉ូលិស ៤នាក់ស្ថិតនៅក្នុងនោះ៕
