បន្ទាប់ពីប្រទេសអាល់ហ្សេរី និងប្រទេសទុយនីស៊ី បាតុកម្មប្រឆាំងទំនិញឡើងថ្លៃបានផ្ទុះឡើងនៅហ្ស៊កដានីកាលពីថ្ងៃទី១៤ មករា កន្លងមក នេះ ។ មនុស្សជាច្រើនរយនាក់បាននាំគ្នាដើរហែក្បួនក្នុងទីក្រុង៣របស់ប្រទេស និងក្នុងរាជធានីអាម៉ង់ផងដែរ ។#មនុស្សរវាងពី៣០០ទៅ៤០០នាក់បានធ្វើបាតុកម្មនៅទីក្រុងការ៉ាក់ ក្រុងអាម៉ង់ និងក្រុងអៀរប៊ីដ ជាទីក្រុងមួយនៅភាគខាងជើងប្រទេសហើយមនុស្ស២០០នាក់ ធ្វើបាតុកម្មនៅក្រុងឌីបាន ភាគខាងត្បូងរាជធានី ។#នៅក្រុងការ៉ាក់ភាគខាងត្បូងប្រទេសពួកអ្នកតវ៉ាបានស្រែកពាក្យស្លោកនានាប្រឆាំងនឹងនាយក រដ្ឋមន្ត្រី លោកសាមៀរ អាល់រ៉ាហ្វៃអុី ។ ពួកគេស្រែកពាក្យថា «យើងតវ៉ាប្រឆាំងនឹងនយោបាយរបស់រដ្ឋាភិបាល ទំនិញឡើងថ្លៃ និងពន្ធដារខ្ពស់» ដែលជំរុញឱ្យប្រជាជនហ្ស៊កដានីធ្វើការបះបោរ ។#ដើម្បីលុបចោលការកើនកំហឹងសង្គមអាជ្ញាធរហ្ស៊កដានីបានប្រកាសកាលពី៣ថ្ងៃមុន កាត់បន្ថយតំលៃស្បៀងជាមូលដ្ឋានទាំងឡាយ និងតំលៃប្រេងឥន្ធនៈ ៕