ចង់ថតសែលហ្វ៊ីជាមួយមនុស្សភពផ្កាយ? អឺរ៉ុបបំពាក់កញ្ចក់សែលហ្វ៊ីលើយានស្រាវជ្រាវភពព្រះអង្គារ

កញ្ចក់ សែលហ្វ៊ី តម្លៃប្រហែល ១,២ពាន់លានដុល្លារ ត្រូវបានបំពាក់នៅលើក្បាលរបស់យាន នឹងជួយឱ្យវាថតរូបខ្លួនឯងបាន នៅលើភពព្រះអង្គារ។

ទីភ្នាក់ងារអវកាសអឺរ៉ុប (ESA) នឹងបំពាក់កញ្ចក់សែលហ្វ៊ី និងម៉ាស៊ីនថតរូបនៅផ្នែកខាងមុខរបស់យានអវកាសក្នុងគម្រោង ExoMars។ យាននេះ តាមគម្រោងនឹងត្រូវបានបាញ់បង្ហោះទៅក្នុងអវកាសនៅឆ្នាំ ២០២០ នេះបើតាមទំព័រ Science World Report ។

កញ្ចក់នេះត្រូវបានរចនាឡើងដោយក្រុមអ្នកវិទ្យាសាស្ដ្រនៃសកលវិទ្យាល័យ Aberytwyth ប្រទេសអង់គ្លេសជាមួយនឹងជំនួយរបស់ ESA។ បណ្ឌិត Matthew Gunn ប្រធានក្រុមអ្នកវិទ្យាសាស្ដ្រឱ្យដឹងថា កញ្ចក់សែលហ្វ៊ីដែលមានតម្លៃប្រហែល ១,២ពាន់លានដុល្លារនេះគឺជាផ្នែកដ៏សំខាន់បំផុតក្នុងការបំពេញបេសកកម្មអវកាស។ កាមេរ៉ានឹងថតយករូបភាពទាំងមូលនៃផ្ទៃខាងលើរបស់ភពក្រហម ខណៈកញ្ចក់ជួយឱ្យវាថតបានរូបភាពរបស់យាន។

បណ្ឌិត Matthew Gunn ថ្លែងថា ៖ “កញ្ចក់សែលហ្វ៊ី នឹងផ្ដល់រូបភាពដែលជួយឱ្យយើងដឹងបាននូវបញ្ហាដែលបានកើតឡើងនៅលើយាន”។

ក្រុមអ្នកវិទ្យាសាស្ដ្រអះអាងថា នេះគឺជាកត្តាសំខាន់ ពិសេសក្រោយពីបញ្ហាបច្ចេកទេសក្នុងពេលខួងដីនៅភពភពព្រះអង្គាររបស់យាន Curiosity នៃទីភ្នាក់ងារអវកាស NASA។ កញ្ចក់គឺជាដំណោះស្រាយដើម្បីពិនិត្យមើលផ្នែកខាងក្រោមរបស់យាន។ ក្រៅពីនេះ រូបភាពដែលកញ្ចក់នេះថតបាន នឹងជួយឱ្យអ្នកវិទ្យាសាស្ដ្ររកឃើញទីកន្លែងសមស្របដើម្បីស្វែងរកជីវិតនៅលើភពព្រះអង្គារ៕

ប្រែសម្រួល ៖ តារាប្រភព ៖ Science World Report