ព័ត៌មានជាតិ ៖ ជាការពិតណាស់ នៅក្នុងអំឡុងប៉ុន្មានថ្ងៃខាងមុននេះ ប្រទេសកម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលអាស៊ានលើកទី២១ ដែលជាប្រវត្តិសាស្ត្រសម្រាប់កម្ពុជា ខណៈពេលដែលមានមេដឹកនាំ ប្រទេសមហាអំណាចលើពិភពលោកមកចូលរួមផងដែរនោះ។
មូលហេតុនេះ អាជ្ញាធររាជធានីភ្នំពេញ សមត្ថកិច្ចគ្រប់លំដាប់ថ្នាក់ និងគណៈកម្មាធិការរៀបចំបុណ្យជាតិ អន្តរជាតិ បានមមាញឹកក្នុងការរៀបចំសួនច្បារ សណ្ដាប់ធ្នាប់ និងសន្តិសុខ នៅតាមដងវិថីនានា ក្នុងរាជធានីភ្នំពេញ ពិសេសនៅតាមដងវិថីដែលគណៈប្រតិភូធ្វើដំណើរឆ្លងកាត់។
ទន្ទឹមនឹងនេះ បញ្ហាសន្ដិសុខ គឺជាប្រធានបទដ៏សំខាន់ដែលរដ្ឋាភិបាលកម្ពុជា បាន និងកំពុងយកចិត្តទុកដាក់ ក្នុងឋានៈជាប្រធានអាស៊ាន ចំពោះគណៈប្រតិភូដែលមកចូលរួមប្រជុំនៅក្នុងកិច្ចប្រជុំកំពូលអាស៊ាន ដែលជាមេដឹកនាំប្រទេសមហាអំណាចធំៗ និងប្រទេសក្នុងតំបន់ ។
អគ្គស្នងការរងនគរបាលជាតិ និង ជាស្នងការនគរបាលរាជធានីភ្នំពេញ លោក ជួន សុវណ្ណមានប្រសាសន៍នៅថ្ងៃទី១៤ វិច្ឆិកា ថា កងកម្លាំងការពារចម្រុះនឹងចូលរួមធ្វើយ៉ាងណាទប់ស្កាត់ និង បង្ការបង្ក្រាបបទល្មើសឧក្រិដ្ឋផ្សេងៗដែលអាចកើតមានឡើង ជាយថាហេតុនៅក្នុងពេលកិច្ចប្រជុំនេះ ស្របពេលអាជ្ញាធរប្រើប្រាស់កងកម្លាំងចម្រុះសរុបជាង ១ ម៉ឺននាក់ដើម្បីការពារសន្តិសុខក្នុងនោះមានកងរាជអាវុធហត្ថ នគរបាលជាតិ និងកងកម្លាំងប្រឆាំងភេរវកម្មផងដែរ៕
ដោយ ៖ រិទ្ធី