ព័ត៌មានអន្តរជាតិ ៖ រូបថតជនសង្ស័យ ដែលនាំយកក្រពើទៅដល់អាកាសយានដ្ឋាននោះត្រូវបានចេញផ្សាយជាសាធារណៈហើយ ក្នុងគោលបំណង ដើម្បីបើកការតាមដានស៊ើបអង្កេតឈានទៅដល់ការចាប់ឃាត់ខ្លួន រង់ចាំការសាកសួរចម្លើយ។
គួររំឭកផងដែរថា រូបថតទាំងនោះ ត្រូវបានថតជាប់ដោយប្រព័ន្ធកាម៉េរ៉ាសុវត្ថិភាព នៅលើរថភ្លើង CTA Blue Line ដោយផ្តិតជាប់ជនសង្ស័យ ដៃកាន់ទៅដោយកូនក្រពើតូចមួយនោះ ពោលគឺ ពីរ ទៅ បី ម៉ោង មុនឃើញវត្តមានកូនក្រពើមួយនោះ នៅឯអាកាសយានដ្ឋានអន្តរជាតិ Chicago's O'Hare International Airport សហរដ្ឋអាមេរិក ។
ដោយឡែក រូបថតដែលបានចេញផ្សាយជាសាធារណៈមួយនេះ គឺជាការចេញផ្សាយដោយអាជ្ញាធរត្រួតពិនិត្យ ការធ្វើដំណើររដ្ឋ Chicago ( Chicago Transit Authority )។ក្រោយពីរកឃើញថាមានវត្តមានកូនក្រពើនៅឯអាកាសយានដ្ឋានហើយនោះ អាជ្ញាធរមានសមត្តកិច្ចបានចុះទៅដល់កន្លែងកើតហេតុ និងចាប់កូនក្រពើមួយក្បាលនោះយកទៅរក្សា។
ផ្ទុយទៅវិញ ជនសង្ស័យដែលជាស្រ្តី ត្រូវបានគេផ្តិតរូបថតបានតាមរយៈប្រព័ន្ធកាម៉េរ៉ាសុវត្ថិភាពនោះ ក្រុមមន្រ្តីប៉ូលីស ក៏កំពុងតែធ្វើការតាមដានស៊ើបអង្កេត ដើម្បីឈានទៅដល់ការចាប់ឃាត់ខ្លួន ដោយនឹងមានការសាកសួរចម្លើយ ខណៈពេលដែលនាងអាចប្រឈមទៅនឹងការផ្តន្ទាទោស ជាការផាកន័យជាសាច់ប្រាក់ផងដែរ៕
ប្រែសម្រួល ៖ កុសលប្រភព ៖ ស្កាយ