iPhone 7 និង iPhone 7 Plus នឹងត្រូវបានប្រកាសឧទ្ទេសនាមជាផ្លូវការនៅក្នុងសប្ដាហ៍ទីពីរនៃខែកញ្ញាខាងមុខ។
បន្ទាប់ពីមានដំណឹងចចាមអារ៉ាមរយៈពេលមួយឆ្នាំកន្លងមក ចុងក្រោយ Apple ក៏បានផ្ញើលិខិតអញ្ជើញអ្នកសារព័ត៌មាន និងដៃគូសហការណ៍ ដើម្បីចូលរួមក្នុងពិធីប្រកាសដ៏ធំរបស់ក្រុមហ៊ុន នៅខែកញ្ញា។
ដូចសព្វមួយដង ក្រុមហ៊ុន Apple មិនបានបង្ហើបឱ្យដឹងច្បាស់អំពីព្រឹត្តិការណ៍របស់ខ្លួននោះទេ គ្រាន់តែនិយាយថា ៖ “សន្យាជួបគ្នានៅថ្ងៃទី ៧កញ្ញា” នៅឯមជ្ឈមណ្ឌល Bill Graham Civic Auditorium ក្នុងទីក្រុង San Francisco អាមេរិក។ ការដែលនិយាយដល់លេខ ៧ គឺបញ្ជាក់ថា ស្មាតហ្វូនថ្មីរបស់ Apple នឹងមានឈ្មោះថា iPhone 7 មិនមែន iPhone 6SE ដូចពាក្យចចាមអារ៉ាមកន្លងមកនោះទេ។
នៅលើលិខិតអញ្ញើញ គេឃើញមានសញ្ញាមូល bokeh មានពណ៌ជាច្រើន ហើយទំព័រសារព័ត៌មានមួយចំនួនយល់ថា ក្នុងព្រឹត្តិការណ៍លើកនេះ Apple នឹងសង្កត់ធ្ងន់ទៅលើសមត្ថភាពនៃការថតរូបរបស់ iPhone ។ Bokeh (តំបន់ព្រឹលៗនៅក្នុងរូបថត) គឺជាជំនាញមួយដែលកម្រនឹងមានកាមេរ៉ាទូរស័ព្ទណាធ្វើបាន។ ដើម្បីធ្វើបានបែបនេះ កាមេរ៉ាត្រូវតែមាន Aperture និងសេនសឺររូបធំ។ iPhone 7 និង 7 Plus ត្រូវបានគេជឿថា នឹងមានកាមេរ៉ាភ្លោះ ឡែន f/1.9 , សេនសឺរ 1/2.6 និង 1/3 ដែលជួយឱ្យការថតរូបបានល្អ បើទោះខ្វះពន្លឺ។
ទន្ទឹមនឹង iPhone ក្រុមហ៊ុន Apple អាចនឹងឧទ្ទេសនាមលំអិតអំពី iOS 10, Apple Watch ម៉ូដែលថ្មី ហើយក៏អាចមានទាំង MacBook ផងដែរ។
ប្រែសម្រួល ៖ តារាប្រភព ៖ appleinsider