ក្រុមអ្នកវិទ្យាសាស្ដ្រ NASA ទើបតែបានរកឃើញទីតាំងដ៏ល្អមួយនៅលើឋានព្រះចន្ទ ដែលអាចឱ្យមនុស្សរស់នៅបាន នេះបើតាម Express។
តាមរយៈយានអវកាស Lunar Reconnaissance Orbiter អង្គការ NASA បានទទួលជោគជ័យក្នុងការសិក្សាស្រាវជ្រាវទៅលើតំបន់ដែលតែងតែងងឹតរបស់ឋានព្រះចន្ទ។ តំបន់នេះ ត្រូវបានរកឃើញថា មានទឹកកក និងមានរណ្ដៅ និងកូនភ្នំច្រើន។
ក្រៅពីនេះ អ្នកវិទ្យាសាស្ដ្រក៏បានរកឃើញសារធាតុនានា ដូចជា អ៊ីត្រូហ្សែន បារត និងធាតុផ្សេងៗដែលលេចចេញពីដី ជាមួយនឹងទឹក។
ដូច្នេះ នៅប៉ូលទាំងពីររបស់ព្រះចន្ទ គឺមានវត្ថុធាតុយ៉ាងតិចពី ១ទៅ២% គឺជាទឹកកកដែលបង្កើតឡើងពីទឹក។ ការរកឃើញនេះ ជួយឱ្យអ្នកវិទ្យាសាស្ដ្រមានមូលដ្ឋានបន្ថែមដើម្បីស្វែងរកវិធីផ្គត់ផ្គង់ទឹកទៅឱ្យមូលដ្ឋានយូរអង្វែងរបស់មនុស្សនៅលើឋានព្រះចន្ទ ក្នុងពេលអនាគត។
បណ្ឌិត Rutherford ឱ្យដឹងថា នេះគឺជាទីតាំងដ៏ល្អដើម្បីសាងសង់មូលដ្ឋាននៅលើឋានព្រះចន្ទ ព្រោះថា បញ្ហាធំបំផុតគឺប្រភពទឹក ត្រូវបានដោះស្រាយ។
ប៉ូលទាំងពីររបស់ព្រះចន្ទ ត្រូវបានគេហៅថា “តំបន់ងងឹត” ព្រោះមនុស្សមិនអាចមើលឃើញ និងវិភាគដោយកែវយឹត ឬផ្កាយរណប ទៅលើតំបន់នេះ។ រូបថតដំបូងគេរបស់តំបន់ងងឹតនេះ ត្រូវបានទីភ្នាក់ងារអវកាសសូវៀត ថតបានកាលពីឆ្នាំ១៩៥៩។
មកដល់ពេលនេះ ថ្វីបើមានប្រទេសមួយចំនួនបានបញ្ជូនមនុស្ស និងម៉ាស៊ីនឡើងទៅកាន់ឋានព្រះចន្ទ ប៉ុន្តែ មិនទាន់មានអ្នកណាម្នាក់ ឈានជើងមកដល់តំបន់ងងឹតនេះនៅឡើយ៕
ប្រែសម្រួល ៖ តារាប្រភព ៖ Express