ព័ត៌មានអន្តរជាតិ ៖ យោងតាមសេចក្តីរាយការណ៍ គូសបញ្ជាក់ឲ្យដឹងថា កូរ៉េខាងត្បូង បានប្រកាស បិទ តំបន់ឧស្សាហកម្មរួម Kaesong ដែលមានទីតាំងក្នុងទឹកដីកូរ៉េខាងជើង ដើម្បីជាការព្រមានដល់របបកុម្មុយនីស កូរ៉េ ខាងជើង ហ៊ានសាកល្បង នុយក្លេអ៊ែរនិងបាញ់គ្រាប់រ៉ុកកែត កាលពី ពេលថ្មីៗ កន្លងទៅនេះ ដែលជាប្រការល្មើសនឹងបម្រាមអន្តរជាតិ។ ក្រោយ ការ ប្រកាសបិទ ក្រុមហ៊ុនកូរ៉េខាង ត្បូងដែលរកស៊ីក្នុង Kaesong កំពុងតែរៀបចំខ្លួនដើម្បីដកចេញពីទីនោះ។
ប្រភពបន្តឲ្យដឹងថា ក្រោយសកម្មភាពផ្គើនផ្ទួនៗរបស់ កូរ៉េ ខាង ជើង រដ្ឋាភិបាលកូរ៉េខាងត្បូងបាន ប្រកាសផ្អាករាល់សកម្មភាពទាំងអស់នៅក្នុង តំបន់ ឧស្សាហកម្មរួម Kaesong ដែលនៅក្នុងទឹកដីកូរ៉េខាងជើង។ ទីក្រុងសេអ៊ូលចាត់ទុកការបិទប្រតិបត្តិនេះ ជា ការ ពិន័យដល់ទីក្រុងព្យុងយ៉ាងដែលហ៊ានល្មើសនឹង បម្រាម អង្គការសហប្រជាជាតិ ដោយបាន សាកល្បងអាវុធអ៊ីដ្រូសែននិងបាញ់ កាំ ជ្រួច ចម្ងាយឆ្ងាយនៅពេល ថ្មីៗនេះ បន្ថែមពីលើនេះ កូរ៉េខាងត្បូងបញ្ជាក់ថាការបិទតំបន់ឧស្សាហ កម្ម Kaesong ជាការសម្រេចចិត្តដែលមិនអាចចៀសផុតបានទេ។ នេះ ក៏ ព្រោះតែកូរ៉េខាងជើងបានយកលុយដែលជាចំណូលរាប់លានពី តំបន់ឧស្សាហកម្មនេះទៅប្រើ ដើម្បីអភិវឌ្ឍកម្មវិធីនុយក្លែអ៊ែរនិង កាំជ្រួចបាលីស្ទិចចម្ងាយឆ្ងាយទៅវិញ។ ហើយវាក៏បានបង្ហាញពី ជំហរឹងមាំរបស់ទីក្រុងសេអ៊ូលទៅដល់របប ទីក្រុងព្យុងយ៉ាងដែលតែងតែផ្គើនម្ដងហើយម្ដងទៀតផងដែរ៕
ប្រភព ៖ CNA