ស្ត្រី ជនជាតិចិនដែលបានហែករូបព្រះឆាយាលក្ខណរបស់សម្ដេចតា គឺនាង Wang Zia Chao អាយុ ៤១ឆ្នាំ ជាមេការរោងចក្រកាត់ដេរ ថបវើលដ៍ ហ្គាមែន (ខេមបូឌ៊ា) អិលធីឌី ត្រូវបានតុលាការកាត់ទោសអោយដាក់គុក ១ ឆ្នាំ។
ចៅក្រម តុលាការសាលាដំបូងរាជធានីភ្នំពេញ បានសម្រេចផ្តន្ទាទោស ស្ត្រីចិនម្នាក់ ដាក់គុក ១ ឆ្នាំ តែត្រូវព្យួរទោស រួចបញ្ជូនទៅប្រទេសចិនវិញ។ ស្ត្រីចិន ដែលជាមេការនៅរោងចក្រកាត់ដេរ នៅខណ្ឌមានជ័យ រាជធានីភ្នំពេញ ជាប់ចោទក្នុងរឿងហែកព្រះឆាយាលក្ខណ៍ព្រះមហាវីរក្សត្រ សម្តេចព្រះ នរោត្តម សីហនុ កាលពីថ្ងៃទី២២ ខែតុលា ឆ្នាំ២០១២។
កាលពីរសៀល ថ្ងៃទី២៣ ខែតុលា ឆ្នាំ២០១២ លោក សេង នាង ចៅក្រមជំនុំជម្រះរបស់តុលាការ សាលាដំបូងរាជធានីភ្នំពេញ បានបើកសវនាការជំនុំជម្រះ និងប្រកាសសាលក្រមសម្រេចផ្តន្ទាទោសស្ត្រីចិន ជាមេការរោងចក្រកាត់ដេរ ដែលខឹងនឹងកម្មករ រួចចាប់កន្ត្រាក់ ហែកចោល និងកាត់ព្រះឆាយាលក្ខណ៍ព្រះមហាវីរក្សត្រ។
បន្ទាប់ពីបើក សវនាការជំនុំជម្រះ ចាប់តាំងពីម៉ោង ២ រសៀល រហូតដល់ព្រលប់ថ្ងៃទី ២៣តុលា ចៅក្រមបានសម្រេចដាក់ពន្ធនាគារ ១ឆ្នាំ តែព្យួរទាំងអស់ និងពិន័យជាប្រាក់ ២ លាន ៥ សែនរៀល ពីបទធ្វើឱ្យខូចខាត ដោយចេតនាព្រះឆាយាលក្ខណ៍ ព្រះបរមសពសម្តេចព្រះ នរោត្តម សីហនុ។ ចៅក្រមក៏បានសម្រេចបណ្តេញស្ត្រីចិននោះ ចេញពីព្រះរាជាណាចក្រកម្ពុជា ដោយយោងតាមមាត្រា ៤១០ ,១០៧ និង៤២២ នៃក្រមព្រហ្មទណ្ឌ។
ដោយ ៖ ចិន្ថាប្រភព ៖ PL