បណ្ដាញសង្គមធំៗ ត្រូវបានគេបិទនៅទួគី ខណៈរដ្ឋប្រហារកំពុងកើតឡើង

បណ្ដាញសង្គមធំៗរបស់ពិភពលោក ត្រូវបានគេបិទ នៅទួគី ខណៈរដ្ឋប្រហារកំពុងធ្វើឱ្យច្របូកច្របល់នៅប្រទេសនេះ។

ទួគីមានភាពច្របូកច្របល់ ពេលមានរដ្ឋប្រហារទម្លាក់ប្រធានាធិបតី

ទំព័រ Cnet បានឱ្យដឹងថា សេវា Facebook, Twitter និង YouTube កំពុងតែត្រូវបានគេបិទ ឬ រអាក់រអួលនៅទូគី ខណៈដែលកងទ័ពទួគីប្រកាសថា បានគ្រប់គ្រងអំណាច ប៉ុន្តែប្រធានាធិបតី Tayyip Erdogan យល់ថា អំពើរដ្ឋប្រហារនឹងត្រូវបានបំផ្លាញ។

មនុស្សជាច្រើននៅទួគី បានប្រើប្រាស់ VPN ឬសេវាកម្មលាក់ឈ្មោះផ្សេងៗដើម្បី បង្ហោះវីដេអូ តាមរយៈ Facebook Live។ ស្ថានភាពច្របូកច្របល់ បានក្លាយជាចំនុចក្ដៅ ដោយមានការផ្សាយនូវវីដេអូ តាម Facebook រាប់សិប កំពុងត្រូវបានធ្វើឡើង។

ចំណែក ប្រធានាធិបតីទួគី Tayyip Erdogan បានប្រើប្រាស់មុខងារ FaceTime នៅលើ iPhone ដើម្បីអំពាវនាវអ្នកគាំទ្រ ឱ្យចេញមកក្រៅ ដើម្បីប្រឆាំងនឹងការធ្វើរដ្ឋប្រហារ និងដើម្បីការពាររដ្ឋាភិបាលស្របច្បាប់។ លោក Tayyip Erdogan ក៏បានបង្ហោះសារនៅលើ Twitter បើទោះជាបណ្ដាញសង្គមនេះ កំពុងត្រូវបានបិទនោះទួគី។

ប្រធានាធិបតីទួគី Tayyip Erdogan បានប្រើប្រាស់មុខងារ FaceTime នៅលើ iPhone ដើម្បីអំពាវនាវអ្នកគាំទ្រ ឱ្យចេញមកក្រៅ

អ្នកនាំពាក្យរបស់ YouTube បានឱ្យដឹងថា សេវាកម្មរបស់ក្រុមហ៊ុន មិនអាចដំណើរការបាននៅទួគី។ អ្នកនាំពាក្យរូបនេះ បន្តថា បញ្ហានេះបានកើតឡើង បើទោះប្រព័ន្ធ YouTube នៅតែដំណើរការល្អ នៅប្រទេសផ្សេងៗ។ រីឯ Facebook និង Twitter មិនទាន់បញ្ចេញប្រតិកម្មអ្វីនៅឡើយ។

ប្រែសម្រួល ៖ បុត្រា