NASA យល់ថា ព្រះអាទិត្យកំពុងតែស្ថិតក្នុងសភាពនឹងនបំផុត ប៉ុន្តែ បើសិនវានៅតែបន្តបែបនេះ គេជឿថា យុគសម័យទឹកកកតូចមួយ អាចនឹងកើតឡើង។
ថ្មីៗនេះ ក្រុមអ្នកជំនាញមកពី NASA បានបញ្ចេញរូបថតមួយចំនួន បង្ហាញថាព្រះអាទិត្យរបស់យើង កំពុងតែស្ថិតក្នុងដំណាក់កាល “ស្ងាត់ស្ងៀម” បំផុត ក្នុងរយៈពេលមួយសតវត្សរ៍កន្លងទៅនេះ។
ព្រះអាទិត្យមិនមានស្នាមខ្មៅ មានន័យថា វាមិនមានព្យុះព្រះអាទិត្យ
ជាក់ស្ដែង រូបថតរបស់ព្រះអាទិត្យ ពេលនេះ ប្រៀបដូចជាបាល់មួយកំពុងតែនៅស្ងៀម ហើយវាមិនមានស្នាមខ្មៅដូចកាលពីមុន។
Vencore Weather ដែលជាអ្នកជំនាញការ មកពី NASA បានឱ្យដឹងថា ស្នាមខ្មៅនៅលើព្រះអាទិត្យ គឺជាតំបន់ងងឹតនៅលើផ្ទៃនៃព្រះអាទិត្យ ហើយវាកើតឡើងដោយសារការប្រែប្រួលនៃម៉ាញេទិច។ ពោលគឺ បើមិនមានស្នាំខ្មៅ នោះមានន័យថា ព្រះទិត្យកំពុងធ្វើសកម្មភាពតិចតួច។ ហើយក្នុងរយៈពេលប៉ុន្មានឆ្នាំខាងមុខ មនុស្សយើងនឹងបានឃើញថា ព្រះអាទិត្យ “ស្លូត” ជាងនេះ។
Vencore Weather បន្តថា ក្នុងវដ្តរបស់ព្រះអាទិត្យ មានពីរដំណាក់កាល ៖ Solar Max និង Solar Minimum ។ នៅដំណាក់កាល Solar Max នឹងមានព្យុះព្រះអាទិត្យកើតឡើងជាបន្តបន្ទាប់ ធ្វើឱ្យប្រព័ន្ធនានានៅលើផែនដីមានការរអាក់រអួល។
ព្រះអាទិត្យ មានស្នាមខ្មៅកាន់តែច្រើន មេឃកាន់តែក្ដៅ
ចំណែកដំណាក់កាល Solar Minimum គឺប្រការផ្ទុយពី Solar Max នឹងកើតឡើង ហើយព្រះអាទិត្យនឹងស្ថិតក្នុងសភាពនឹងន មិនមានព្យុះព្រះអាទិត្យ ហើយនៅលើព្រះអាទិត្យ ពេលខ្លះ ក៏មិនមានស្នាមខ្មៅ ឧទាហរណ៍ដូចពេលនេះជាដើម។
ការដែលព្រះអាទិត្យនៅ “ស្ងាត់ស្ងៀម” គឺមានប្រយោជន៍ដល់បណ្ដាប្រព័ន្ធនានា ដូចប្រព័ន្ធទូរស័ព្ទជាដើម ប៉ុន្តែ ក្រុមអ្នកសិក្សាស្រាវជ្រាវបានព្រមានថា បើសិនព្រះអាទិត្យនៅ “ស្ងាត់ស្ងៀម” បែបនេះ ក្នុងរយៈពេលយូរ នោះផែនដី អាចនឹងប្រឈមនឹងយុគសម័យទឹកកកក្នុងពេលអនាគត។
យុគសម័យទឹកកកតូចមួយអាចនឹងកើតឡើង បើព្រះអាទិត្យមិនមានព្យុះ
NASA បានឱ្យដឹងថា ដំណាក់កាលព្រះអាទិត្យ “នៅស្ងៀម” អាចនឹងបន្តរហូតដល់ឆ្នាំ ២០៣០។ បើដូច្នេះមែន គឺមានន័យថា មនុស្សនឹងត្រូវស្ថិតក្នុងភាពត្រជាក់ខ្លាំងក្នុងរដូវរងា ក្នុងរយៈពេលប៉ុន្មានឆ្នាំខាងមុខ។
ប្រែសម្រួល ៖ បុត្រា