ផ្កាយដុះកន្ទុយ 45P/HMP នឹងបង្ហាញខ្លួនម្ដងទៀត នៅខែកុម្ភៈខាងមុខ

នៅដើមខែក្រោយនេះ អ្នកស្រលាញ់វិស័យតារាសាស្ដ្រ នឹងមានឱកាសទស្សនាផ្កាយដុះកន្ទុយ 45P/HMP ម្ដងទៀត។

ឆ្នាំ ១៩៤៨ ផ្កាយដុះកន្ទុយ 45P/HMP (45P/Honda-Mrkos-Pajdusakova) ត្រូវបានរកឃើញក្នុងពេលតែមួយ ដោយតារាវិទូ Minoru Honda ជនជាតិជប៉ុន និងតារាវិទូជនជាតិឆែក គឺ Antonin Mrkos និង Ludmila Pajdusakova នេះបើតាមទំព័រ Mother Nature Network។ ផ្កាយដុះកន្ទុយនេះ បង្ហាញខ្លួននៅក្បែរផែនដី ក្នុងវដ្ដ ៥ឆ្នាំម្ដង។

ផ្កាយដុះកន្ទុយ 45P/HMP នឹងហោះមកក្បែរផែនដីបំផុត នៅថ្ងៃទី ១១កុម្ភៈ ក្នុងរយៈចម្ងាយ ១២,៤លានគីឡូម៉ែត្រ

ថ្ងៃទី ១១កុម្ភៈ ឆ្នាំ២០១៧ខាងមុខនេះ ផ្កាយដុះកន្ទុយ 45P/HMP នឹងហោះមកក្បែរផែនដីបំផុត ក្នុងរយៈចម្ងាយ ១២,៤លានគីឡូម៉ែត្រ។ 45P/HMP នឹងបង្ហាញខ្លួនជាមួយនឹងក្បាលពណ៌ទឹកសមុទ្រ និងពណ៌បៃតង ក្បែរកញ្ចុំផ្កាយ Hercules នៅមុនថ្ងៃរះ។ អ្នកដែលស្រលាញ់វិស័យតារាសាស្ដ្រ អាចទស្សនាផ្កាយដុះកន្ទុយ 45P/HMP បានដោយប្រើកែវយឹង។

សូមរំលឹកថា ផ្កាយដុះកន្ទុយនេះ ធ្លាប់បានបង្ហាញខ្លួនម្ដងរួចមកហើយ កាលពីបុណ្យចូលឆ្នាំសកល ២០១៧៕

ប្រែសម្រួល ៖ តារាប្រភព ៖ freestarcharts