ជនសង្ស័យបានសារភាពថា ធ្លាប់ធ្វើការនៅមជ្ឈមណ្ឌលជនពិការ Tsukui Yamayuri-en ហើយជននេះ បានប្រើកាំបិទ ចាក់សម្លាប់មនុស្ស ១៩នាក់ និងធ្វើឱ្យ ៤១នាក់ផ្សេងទៀត រងរបួស កាលពីព្រឹកព្រលឹមនេះ។
បុរសម្នាក់អាយុប្រហែល ២០ឆ្នាំ ត្រូវបានចាប់ខ្លួនកាលព្រឹកមិញនេះ បន្ទាប់ពីបានប្រើប្រាស់កាំបិទ សម្លាប់មនុស្សនៅឯមជ្ឈមណ្ឌលសម្រាប់ជនពិការ ក្នុងខែត្រ Kanagawa ប្រទេសជប៉ុន នេះបើតាមសេចក្ដីរាយការណ៍របស់ NHK។
នគបាលខែត្រ Kanagawa បានឱ្យដឹងថា ជនសង្ស័យបានធ្វើសកម្មភាពនៅមជ្ឈមណ្ឌល Tsukui Yamayuri-en ក្នុងខណ្ឌ Sagamihara កាលពីវេលាម៉ោង ២ និង៣០នាទី ដែលក្រោយមកជននេះ បានទៅកាន់ការិយាល័យនគរបាលដើម្បីសារភាព។ ជនសង្ស័យ បានឆ្លើយសារភាពថា ខ្លួន “ចង់បំបាត់ជនពិការឱ្យអស់ពីពិភពលោក”។
សាក្សីម្នាក់នៅក្បែរមជ្ឈមណ្ឌលជនពិការខាងលើ បានឱ្យដឹងថា បុរសម្នាក់ដែលមានសក់ពណ៌លឿង ស្លៀកពាក់ពណ៌ខ្មៅ ត្រូវបាននគរបាលចាប់ខ្លួន។
នេះគឺជាការសម្លាប់មនុស្សដ៏គួរឱ្យខ្លាចបំផុតនៅជប៉ុន ចាប់តាំងពីក្រោយសង្គ្រាមលោកលើកទីពីរ មកទល់នឹងពេលនេះ។
សូមបញ្ជាក់ថា មជ្ឈមណ្ឌល Tsukui Yamayuri-en គឺជាកន្លែងមួយដែលផ្ដល់សេវាស្នាក់នៅ និងថែទាំសុខភាពសម្រាប់ជនពិការ និងមានហេត្ថារចនាសម្ព័ន្ធទំនើប ដូចជាមានអាងហែលទឹក បន្ទប់ហាត់ប្រាណ និងបន្ទប់សុខាភិបាល។ល។
ប្រែសម្រួល ៖ បុត្រា