ព័ត៌មានអន្តរជាតិ ៖ ទីភ្នាក់ងារសារព័ត៌មានបរទេស មេត្រូ កាលពីប៉ុន្មានម៉ោងមុននេះ បានគូសបញ្ជាក់អោយដឹងថា ស៊ីរី មានផ្ទុកសារធាតុអាវុធគីមីដល់ទៅ ១ ពាន់តោនឯណោះ នេះបើយោងតាមការលេចធ្លាយចេញពីឯកសារស៊ើបការណ៍របស់ប្រទេសបារាំង។
លើសពីនេះ ក៏មានសេចក្តីថ្លែងការណ៍បញ្ជាក់យ៉ាងច្បាស់ថា នៅឃ្លាំងស្តុកទុកអាវុធរបស់ស៊ីរី នៅក្នុងនោះរួមមានសារធាតុគីមី ស៊ីរិន (sarin) , ឧស្ម័នម៉ូតាត (mustard gas)និងសារធាតុបំផ្លាញប្រព័ន្ធប្រសាទ VX (VX nerve agent) ជាដើម។
តែទោះជាយ៉ាងណាក៏ដោយលោកប្រធានាធិបតី Bashar al Assad នៅតែបដិសេធជាដាច់ខាត ទៅនឹងការលើកឡើងថា ខ្លួនបានប្រើប្រាស់នូវអាវុធគីមីនោះ។ គួររំឭកផងដែរថា ឯកសារទាំងនោះ ត្រូវបានបោះពុម្ពផ្សាយនៅលើកាសែតក្នុងស្រុក Le Journal Du Dimancheហើយត្រូវបានអះអាងថា រាល់ព័ត៌មានទាំងអស់ គឺពិតប្រាកដមែន ពីសំណាក់រដ្ឋាភិបាលផ្លូវការរបស់ប្រទេសបារាំង។
ដោយឡែកបន្ទាប់ពីមានការដកខ្លួនក្នុងការធ្វើបទអន្តរាគមន៍កម្លាំងយោធាទៅលើប្រទេសស៊ីរី ពីសំណាក់ប្រទេសអង់គ្លេសហើយនោះ រដ្ឋាភិបាលសហរដ្ឋអាមេរិក បានដកខ្លួនថយមួយជំហាន ខណៈពេលដែលបាត់ការគាំទ្រពីសំណាក់ប្រទេស ដែលជាសម្ព័ន្ធមិត្តដ៏ចម្បងមួយនេះ ក្នុងការថ្កោលទោសទៅលើរដ្ឋាភិបាលប្រទេសស៊ីរី ដោយបានប្រើប្រាស់អាវុធគីមីក្នុងការវាយប្រហារសម្លាប់ជនស៊ីវិលដល់ទៅជាង ១,៤០០ នាក់។
ផ្ទុយទៅវិញ មកទល់នឹងខណៈនេះ រដ្ឋាភិបាលប្រទេសអង់គ្លេស ជាពិសេសលោកប្រធានាធិបតី David Cameron ក៏កំពុងតែទទួលរងសម្ពាធ អោយមានការគិតគូរឡើងវិញសាជាថ្មីបន្ទាប់ពីសហរដ្ឋអាមេរិក ក៏ដូចជាអ្នកសង្កេតការណ៍អន្តរជាតិ បានអះអាងថាខ្លួនបានរកឃើញសារធាតុគីមី ស៊ីរិន ពិតជាបានប្រើនៅក្នុងការវាយប្រហារពិតប្រាកដមែន។
ខណៈបាត់បង់ប្រទេសអង់គ្លេស ជាសម្ព័ន្ធដ៏ធំរបស់ខ្លួនក៏ពិតមែន តែសហរដ្ឋអាមេរិកនៅបន្តមានប្រទេសបារាំងមួយផ្សេងទៀតផងដែរ ដែលប្រកាន់ខ្ជាប់ នឹងគោលជំហរក្នុងការប្រើប្រាស់កម្លាំងយោធា ប្រឆាំងទៅនឹងការវាយប្រហារ ដោយអាវុធគីមីក្នុងរបបដឹកនាំរបស់លោក Bashar al-Assad ។
ទន្ទឹមនឹងនេះ សម្ព័ន្ធមិត្ត ដែលជាដៃគូរបស់ស៊ីរី គឺប្រទេសរុស្ស៊ីនោះ តែងតែលើកឡើងថាការលូកដៃចូលក្នុងកិច្ចការផ្ទៃក្នុងរបស់ប្រទេសដទៃវាពិតជាគ្មានលទ្ធផលល្អនោះទេ ស្របពេលដែល សេចក្តីថ្លែងការណ៍ចុងក្រោយរបស់រដ្ឋមន្រ្តីក្រសួងការបរទេស លោក Sergey Lavrov រាល់ភស្តុតាងដែលបានលើកឡើងថា ស៊ីរី បានប្រើប្រាស់អាវុធគីមីនោះគឺ មិនគួរអោយជឿទុកចិត្តនោះទេ។
គួរបញ្ជាក់ផងដែរថា លោក Bashar al-Assad បានធ្វើការព្រមានដល់បណ្តាប្រទេសដែលបានគំរាមគំហែង ក្នុងការវាយប្រហារមកលើប្រទេសរបស់ខ្លួនថា ៖ ភាគីណាដែលលូកដៃចូលកិច្ចការផ្ទៃក្នុង ទាំងកម្លាំងយោធា និងហិរញ្ញវត្តុ គឺជាសត្រូវរបស់ប្រជាជនស៊ីរី៕
* ព័ត៌មានមួយចំនួនផ្សេងទៀត មាននៅខាងក្រោម ៖
- ផ្ទុះអាវុធ នៅមូលដ្ឋានទ័ព សហរដ្ឋអាមេរិក ជាង ២ ម៉ោង សម្លាប់មនុស្ស រង្គាល- ផ្ទុះឆេះ វិទ្យាល័យមួយកន្លែង ចាប់ឃាត់ខ្លួនក្មេង ៥ នាក់ ពីបទបង្កហេតុ- ស៊ីរី មិនញញើត ខណៈអាមេរិក ថានឹងអាចមាន ការវាយប្រហារកម្លាំងយោធា ក្រោយរកឃើញ ស៊ីរី ពិតជាប្រើអាវុធគីមី
ដោយ ៖ ពិសិដ្ឋប្រភព ៖ មេត្រូ