វីដេអូមួយរបស់ក្រុមអ្នកស្វែងរកមនុស្សភពផ្កាយនៅក្នុងអវកាស បានបង្ហាញអំពីរូបភាពដែលដូចទៅនឹងទីតាំងរបស់មនុស្សភពផ្កាយបុរាណនៅលើភពព្រះអង្គារ។
ក្រុម “អ្នកប្រមាញ់មនុស្សភពផ្កាយ” (UFAH) ទើបតែបានបញ្ចេញរូបថតទាំងឡាយដែលយកពីឧបករណ៍សិក្សាស្រាវជ្រាវរបស់ NASA បានបង្ហាញថា មានដានជាច្រើនអាចជារបស់មនុស្សភពផ្កាយបុរាណ នេះបើតាមទំព័រ Daily Star។
ក្នុងវីដេអូនេះ គេឃើញមានរូបភាពចម្លែក ហាក់ដូចជារូបដែលត្រូវបានគេឆ្លាក់នៅលើថ្មរបស់ភពព្រះអង្គារ នៅក្នុងតំបន់ Elysium Planitia នៅក្បែរខ្សែអេក្វាទ័ររបស់ភពនេះ។
រូបភាពមួយចំនួន មានរូបរាងដូចទៅនឹងដំបូលអ្វីមួយ ជាមួយនឹងរង្វង់មូលព័ន្ធជុំវិញ។ UFAH ជឿថា នេះអាចជាទីក្រុងដែលមានជញ្ជាំងព័ន្ធជុំវិញ។ ជាងនេះ មានការបញ្ចេញមតិនៅលើ Youtube ថា បណ្ដាសំណង់នៅលើភពព្រះអង្គារនេះ គឺដូចទៅនឹងសំណង់នៅអាហ្វ្រិកខាងត្បូង។
ផ្ទៃដីនៅលើភពព្រះអង្គារ បច្ចុប្បន្នមានសភាពកក ប៉ុន្តែ អ្នកវិទ្យាសាស្ដ្រជឿថា ភពនេះធ្លាប់មានអាកាសធាតុសមស្របសម្រាប់រស់នៅ ដោយយោងទៅលើការសិក្សាស្រាវជ្រាវទៅលើដីរបស់ភពក្រហមនេះ។ រូបភាពរបស់ភពព្រះអង្គារដែលថតពីយានរបស់ NASA ក៏បានឱ្យដឹងថា វាលរាប Elysium Planitia ធ្លាប់ជាកន្លែងដែលមានភ្នំភ្លើងច្រើនផងដែរ។
សូមរំលឹកដែរថា ក្រុម UFAH ក៏ធ្លាប់បានប្រកាសថា ភពសុក្រ (Venus) គឺជាកន្លែងរស់នៅរបស់មនុស្សភពផ្កាយ ដែលពួកគេមានសមត្ថភាពរស់នៅក្នុងអាកាសធាតុអាក្រក់។
ប្រែសម្រួល ៖ តារាប្រភព ៖ Dailymail