ព័ត៌មានជាតិ ៖ រយៈពេលប៉ុន្មានសប្តាហ៍ចុងក្រោយនេះ កាលបើលោកអ្នក ហៅទូរស័ព្ទចេញទៅនរណា ម្នាក់ហើយនោះ ច្បាស់ណាស់ប្រាកដជាបានឮខ្សែអាថ៍សម្លេង មីក្រូហិរញ្ញវត្ថុទាំងអស់នៅកម្ពុជា ជារបស់ឯកជន និងមិនមែនជារបស់រដ្ឋទេ សូមបងប្អូនប្រជាពលរដ្ឋទាំងអស់មេត្តាកុំយល់ច្រឡំ ដែលនេះគឺជា ចំណាត់ការថ្មី ដែលត្រូវបានដាក់ចេញដោយរដ្ឋាភិបាលកម្ពុជា ក្នុងការបជ្រាប ការយល់ដឹងឲ្យកាន់តែច្បាស់ ពីស្ថាប័ន គ្រឹះស្ថាន មីក្រូហិរញ្ញវត្ថុ ឲ្យបានទៅដល់គ្រប់បងប្អូនប្រជា ពលរដ្ឋខ្មែរនៅទូទាំងប្រទេស។
យ៉ាងណាមិញ រយៈពេលមិនដល់ ២៤ម៉ោងមុននេះ ពោលត្រឹមតែ ១០ម៉ោងកន្លងទៅ បើយោងតាម Page ផ្លូវការ និយ័តករទូរគមនាគមន៍កម្ពុជា - TRC គូសបញ្ជាក់ក្តែងៗតាមរយៈការបង្ហោះសេចក្តីប្រកាស ២សន្លឹក អមជាមួយនឹង អត្ថន័យជារួមឲ្យដឹងថា និយ័តករទូរគមនាគមន៍កម្ពុជា៖ ដោយពិនិត្យឃើញថា បងប្អូនប្រជាពលរដ្ឋ និង សាធារណៈជនទាំងអស់ បានយល់ជ្រួតជ្រាបច្បាស់លាស់នូវខ្លឹមសារថា «មីក្រូហិរញ្ញវត្ថុទាំងអស់នៅកម្ពុជា ជារបស់ឯកជន និងមិនមែនជារបស់រដ្ឋទេ សូមបងប្អូនប្រជាពលរដ្ឋទាំងអស់មេត្តាកុំយល់ច្រឡំ» តាមរយះការដាក់បញ្ចូលសំឡេងរោទ៍តាមទូរស័ព្ទចល័តក្នុងរយៈពេល ០១ខែ កន្លងមក និង ទទួលបានអនុសាសន៍ណែនាំពីប្រមុខរាជរដ្ឋាភិបាល និយ័តករទូរគមនាគមន៍កម្ពុជា សូមធ្វើការណែនាំជូនដល់ប្រតិបត្តិករទូរស័ព្ទចល័តទាំង ០៦ ធ្វើការបញ្ឈប់ការដាក់សំឡេងរោទ៍នេះចេញពីទូរស័ព្ទរបស់អតិថិជន ឬ អ្នកប្រើប្រាស់សេវារបស់ខ្លួន ចាប់ពីថ្ងៃទី២០ខែមីនាឆ្នាំ២០១៧ តទៅ។ និយ័តករទូរគមនាគមន៍កម្ពុជា សូមវាយតម្លៃខ្ពស់ដល់ប្រតិបត្តិករទូរស័ព្ទចល័តទាំង ០៦ ដែលបានខិតខំសហការអនុវត្តកិច្ចការនេះជាមួយរាជរដ្ឋាភិបាល ទទួលបានលទ្ធផលល្អ!
