ព័ត៌មានអន្តរជាតិ ៖ សមាជិកព្រឹទ្ធសភាសម្លេងភាគតិចលោក Chuck Schumer បានបង្ហើបឱ្យដឹងថា លោកបានប្រាប់លោកប្រធានាធិបតី Trump ថា ការសម្រេចចិត្តរបស់លោក ក្នុងការបណ្ដេញលោក James Comey នាយកការិយាល័យស៊ើបអង្កេតសហព័ន្ធ (FBI) ចេញពីតំណែង គឺជា«កំហុសដ៏ធំមួយ»។
លោក Schumer បានប្រាប់អ្នកកាសែត កាលពីថ្ងៃអង្គារថា៖ «កាលពីរសៀលម្សិលម៉ិញនេះ លោកប្រធានាធិបតី Trump បានហៅទូរស័ព្ទមកខ្ញុំ ហើយបានប្រាប់ខ្ញុំថា លោកបានបណ្ដេញលោកនាយក Comey ចេញពីតំណែងហើយ ។ «ខ្ញុំបានប្រាប់លោកប្រធានាធិបតីថា៖ លោកប្រធាន ជាទីគោរព លោកកំពុងសាងកំហុសដ៏ធំមួយ»។
លោកបានបន្ថែមថា លោក Trump ពុំបាន ឆ្លើយតប ចំពោះមតិយោបល់របស់គាត់ឡើយ។លេខាធិការទទួលបន្ទុកផ្នែកសារព័ត៌មានប្រចាំសេតវិមាន លោក Sean Spicer បានប្រាប់អ្នកកាសែតថា លោក Trump បានបណ្ដេញលោក Comey ចេញពីតំណែង កាលពីថ្ងៃអង្គារ ដោយផ្អែកលើអនុសាសន៍នៃសម័យប្រជុំរបស់អគ្គមេធាវី លោក Jeff និងអគ្គមេធាវីរងរបស់លោក គឺលោក Rod Rosenstein ។ លោក Trump បានសរសេរ នៅក្នុងលិខិតមួយទៅកាន់លោក Comey ថា FBI ត្រូវស្តារ ជំនឿទុកចិត្ដរបស់សាធារជនឡើងវិញ។
សមាជិកព្រឹទ្ធសភាគណបក្សសាធារណរដ្ឋ បានរារាំងមិនឱ្យបញ្ចប់មុខតំណែង របស់លោក Comey ឡើយ។ សមាជិកព្រឹទ្ធសភាសម្លេងភាគច្រើន លោក Whip John Cornyn បានចង្អុលបង្ហាញថា ប្រធាន FBI អាចបាត់បង់មុខតំណែង នៅពេលណាមួយ ដោយសារប្រធានាធិបតី។
លោក Schumer បាននិយាយថា សំណួរដំបូង ដែលចោទសួររដ្ឋបាលរបស់លោក Trump គឺថា ហេតុអ្វីបានជា លោកប្រធានាធិបតី សម្រេចចិត្តបណ្ដេញលោក Comey ចេញពីតំណែងនាពេលឥឡូវនេះ។ FBI កំពុងស៊ើបអង្កេត ចំពោះការជ្រៀតជ្រែករបស់រុស្ស៊ី នៅក្នុងការប្រណាំងបប្រជែងតំណែងសេតវិមាន និងទំនាក់ទំនងណាមួយរវាងយុទ្ធនាការឃោសនាបោះឆ្នោតឆ្នាំ ២០១៦ និងទីក្រុងម៉ូស្គូ ។
លោក Schumer បានភ្ជាប់ការបណ្ដេញលោក Comey ចេញពីតំណែង ទៅនឹងការបណ្តេញអតីតអគ្គមេធាវីរងអ្នកស្រី Sally Yates និងបានរំលឹកឡើងវិញពីការអំពាវនាវរបស់លោកឱ្យក្រសួងយុត្តិធម៌តែងតាំងរដ្ឋរាជអាជ្ញាពិសេស ដើម្បីស៊ើបអង្កេត ចូលទៅក្នុងការបោះឆ្នោតឆ្នាំ ២០១៦។
លោក Schumer បានឱ្យដឹងថា៖ នេះគឺជាផ្នែកមួយនៃលំនាំបញ្ហាយ៉ាងជ្រាលជ្រៅ ពីរដ្ឋបាលរបស់លោក Trump ។ «នេះហាក់ដូចជាមិនមែនជារឿងចៃដន្យនោះទេ។
គណបក្សប្រជាធិបតេយ្យ បានអំពាវនាវរយៈពេលជាច្រើនខែមកហើយ ដើម្បីឱ្យក្រសួងយុត្តិធម៌ តែងតាំងទីប្រឹក្សាពិសេសមួយរូប ដោយអះអាងថា មន្រ្ដីណាម្នាក់ ដែលត្រូវបានតែងតាំង ដោយលោកប្រធានាធិបតី នឹងប្រឈមមុខនឹងសម្ពាធនយោបាយ។ លោក Schumer បានបន្ថែមទៀតថា ប្រសិនបើលោក Rod Rosenstein អគ្គរដ្ឋអាជ្ញារង បដិសេធមិនតែងតាំង រដ្ឋអាជ្ញាពិសេសម្នាក់ទេ ពលរដ្ឋអាមេរិកគ្រប់រូប នឹងសង្ស័យថា ការសម្រេចចិត្តបណ្ដេញលោកនាយក Comey ចេញពីតំណែងនេះ គឺជាផ្នែកមួយនៃចេតនាបិតបាំងកំហុស ។ លោកបានថ្លែងថា៖ «ការស៊ើបអង្កេតលើករណីនេះ ត្រូវតែធ្វើឡើងឱ្យបានល្អិតល្អន់ តាមតែអាចធ្វើទៅបានពីសេតវិមាន »៕
ប្រែសម្រួល៖ សារ៉ាត
ប្រភព៖ The Hill