ប្រជាជនកម្ពុជាភាគច្រើន ជាពិសេសយុវវ័យមួយចំនួនធំ បានដឹងរួចមកហើយថា ថ្ងៃនេះគឺជាថ្ងៃចុងក្រោយក្នុងការប្រឡងបញ្ចប់ទុតិយភូមិថ្នាក់ជាតិទូទាំងប្រទេស បន្ទាប់ពីមានការប្រឡងយ៉ាងស្វិតស្វាញក្នុងអំឡុងពេលប៉ុន្មានថ្ងៃចុងក្រោយ។
គួរបញ្ជាក់ផងដែរថា នៅម៉ោងប្រមាណជាង 11:30 នាទីព្រឹក ថ្ងៃទី 08 ខែសីហា ឆ្នាំ2012 នេះ ពោលគឺជាថ្ងៃចុងក្រោយ នៃការប្រលងបញ្ជប់ទុតិយភូមិថ្នាក់ជាតិ ក្រុមការងាររបស់ភ្នាក់ងារសារព័ត៌មាន Camnews ក៏បានចុះទៅផ្ទាល់ដល់មណ្ឌលប្រឡង នៃវិទ្យាល័យ ហ៊ុនសែន ប៊ុនរានីផ្សារដើមថ្កូវ ដើម្បីធ្វើកិច្ចសម្ភាសជាមួយនឹងបេក្ខភាព ដែលទើបតែបានចេញពីមណ្ឌលប្រលង។
ក្រោយពីធ្វើកិច្ចសម្ភាសន៍ជាមួយនឹងបេក្ខជនម្នាក់ ដែលជាបេក្ខភាពក្នុងការប្រឡងបញ្ចប់នោះបានអោយដឹងថា ដំណើរការនៃការប្រលងបញ្ចប់ទុតិយភូមិថ្នាក់ជាតិប្រចាំឆ្នាំនេះ ប្រព្រឹត្តិទៅបានយ៉ាងរលូន ពុំមានភាពអសកម្មណាមួយ បានកើតឡើងនោះទេ ហើយយុវសិស្សម្នាក់នេះ ដែលមានឈ្មោះថា ចន្ធីឧត្តម មានវ័យ 19 ឆ្នាំ ដែលបានមកពីវិទ្យាល័យ បឹងត្របែក បានបន្ថែមអោយដឹងថា វិញ្ញាសារដែលត្រូវប្រឡងបញ្ចប់ក្នុងថ្ងៃនេះ មានចំនួនពីរវិញ្ញាសារ គឺ វិញ្ញាគណិតវិទ្យា នឹង វិញ្ញាសាភាសាបរទេស។ លើសពីនេះទៅទៀត យុវសិស្សម្នាក់នេះ ក៏បានបញ្ជាក់បន្ថែមផងដែរថា គេមានសង្ឃឹមដល់ទៅជាង 80% ឯណោះក្នុងការប្រលងជាប់ នេះក៏ដោយសារតែគេបានត្រៀមខ្លួនរួចជាស្រេច ពោលគឺគេបានព្យាយាមខិតខំរៀនសូត្រ មុនពេលដែលថ្ងៃប្រឡងបានចូលមកដល់។
គួរបញ្ជាក់ផងដែរថា ដំណើរការនៃការប្រលងបញ្ចប់ទុតិយភូមិថ្នាក់ជាតិ ប្រចាំឆ្នាំនេះ ត្រូវបានប្រារព្វធ្វើឡើងទូទាំងប្រទេស ចាប់តាំងពីថ្ងៃទី 06 ខែ សីហា ឆ្នាំ 2012 ដល់ថ្ងៃទី 08 ខែសីហា ឆ្នាំ 2012 ដោយឡែក បើយោងតាមសម្តីរបស់យុវសិស្សប្រចាំមណ្ឌលមួយនេះ បានអោយដឹងថា លទ្ធផលនៃការប្រឡងនឹងត្រូវបានប្រកាសជាផ្លូវការ ក្នុងអំឡុងថ្ងៃទី 26 ខែសីហា ឆ្នាំ 2012 ខាងមុខនេះ៕
ដោយ ៖ មង្គល