ការបង្រាបរបស់នគរបាលអាមេរិក ទៅលើក្រុមឧក្រិដ្ឋជនដើមកំណើតវៀតណាម បាននាំឱ្យមានការចាប់ខ្លួន និងរឹបអូសបានអាវុធ គ្រឿងញៀន និងម៉ាស៊ីនលេងល្បែងជាច្រើន។
បញ្ជីឈ្មោះនៃក្រុមជនសង្ស័យ ក្នុងយុទ្ធនាការចុះបង្រាបដែលមានឈ្មោះថា Gang of Thrones
យោងតាម LA Times ការចុះបង្រាបត្រូវបានធ្វើឡើងនៅតំបន់មួយចំនួននៃទីក្រុង San Jose រដ្ឋ California អាមេរិក ហើយវាគឺជាលទ្ធផលនៃការស្រាវជ្រាវរយៈពេល៦ខែ របស់នគរបាល ទៅលើខ្សែរយៈនៃការលេងល្បែង ជួញគ្រឿងញៀន ដែលធ្វើសកម្មភាពនៅក្នុងហាងកាហ្វេមួយចំនួនរបស់ជនជាតិវៀតណាម។
នគរបាលប្រកាសថា ជនសង្ស័យចំនួន ២៣នាក់ត្រូវបានចាប់ខ្លួន ក្រោមបទចោទប្រកាន់ថា បានជំរិតទារប្រាក់ សូកប៉ាន់ ជួនដូរគ្រឿងញៀន និងប្រើអាវុធខុសច្បាប់។ ក្នុងចំណោមនោះ ក៏មាននគរបាលម្នាក់ឈ្មោះ Derrick Antonio ដែលត្រូវបានចោទប្រកាន់ពីបទរួមដៃជាមួយក្រុមឧក្រិដ្ឋជនខាងលើ។
វត្ថុតាងដែលនគរបាលរឹបអូសបានក្នុងការចុះបង្រាប
ជនសង្ស័យចំនួន ៦នាក់ បច្ចុប្បន្ន កំពុងរត់គេចខ្លួន។ ចំណែក មន្ដ្រីនគរបាល Derrick Antonio អាយុ ៣៤ឆ្នាំ ដែលបានបម្រើការជាភ្នាក់ងារនគរបាលរយៈពេល ៩ឆ្នាំ បច្ចុប្បន្ន ត្រូវបានធានាឱ្យនៅក្រៅឃុំ។
នគរបាលបានចាប់ខ្លួនជនជាតិវៀតណាម និងម៉ាស៊ីនលេងល្បែង នៅក្នុងហាងកាហ្វេ Xinh Xinh ក្នុងក្រុង San Jose កាលពីខែមិនា
ករណីខាងលើនេះ នគរបាលក៏រឹបអូសបានប្រាក់ចំនួន ២០០.០០០ដុល្លារ គ្រឿងញៀនជាង ២៧០គីឡូក្រាម កាំភ្លើងខ្លីចំនួន ៥ដើម ម៉ាស៊ីនលេងល្បែងចំនួន ៦៩គ្រឿង និងក្រពើមួយក្បាលផងដែរ។ នាយនគរបាលក្រុង San Jose លោក Eddie Garcia និងមន្ដ្រីរបស់ FBI រួមនឹងមន្ទីរប្រឆាំងគ្រឿងញៀន បានប្រកាសអំពីយុទ្ធនាការចុះបង្រាបនេះ នៅក្នុងសន្និសីទសារព័ត៌មានមួយកាលពីម្សិលមិញ។
ប្រែសម្រួល ៖ តារា