ភ្នំពេញ ៖ ហេតុការណ៍ ភ្ញាក់ផ្អើល មួយបានកើតឡើង យ៉ាងខ្លាំងក្នុង ខណៈដែលក្មេង ស្រីរូបស្រល់ អាយុជិត ២០ ឆ្នាំម្នាក់ ទំនងជាញៀនថ្នាំ នឹងសរសៃប្រសាទផងនោះ បានរើសដុំថ្មគប់គេ គប់ឯង ពេញផ្លូវលេខ ១៦៣ កែងផ្លូវលេខ ៣៤៨ ក្នុងសង្កាត់ បឹងកេងកងទី៣ ខណ្ឌចំការមន កាលពីវេលាម៉ោង ២០ និង ១០ នាទីយប់ ថ្ងៃទី ០៩ ខែកក្កដាឆ្នាំ ២០១៣ ។
យោងតាមប្រភព ព័ត៌មានពីសាក្សី នៅកន្លែងកើត ហេតុខាងលើនេះ បានឲ្យដឹងថា មុនកើតមានព្រឹត្តការណ៍ ភ្ញាក់ផ្អើល ដំបូងឡើយគឺ មិនដឹងថា ក្មេងស្រីរូបស្រល់នេះ ដើរពីកន្លែងណា ឬក៏ជិះម៉ូតូមកពីណាទេ បានជាមកដល់ចំណុចផ្លូវលេខ ១៦៣ កែងផ្លូវលេខ ៣៤៨ ចំណុចកើតហេតុខាងលើនេះ ស្រាប់តែ មិនដឹងជារូបគេមានរឿងអ្វី បានជារើសដុំឥដ្ឋគប់ មនុស្សម្នា ជាច្រើន ដែលកំពុងធ្វើដំណើរឆ្លងកាត់ កន្លែងកើតហេតុ បណ្តាលឲ្យមនុស្ស៣ទៅ ៤ នាក់ត្រូវរបួស ។ បន្ទាប់ពីមានហេតុការណ៍ភ្ញាក់ផ្អើល ខាងលើប្រជាពលរដ្ឋ បានរាយការណ៍ ទៅសមត្ថកិច្ចមូលដ្ឋាន ឲ្យចុះមកអន្តរាគមន៍ ភ្លាមៗ ដើម្បីឃាត់ខ្លួនក្មេងស្រី រូបស្រល់នេះ យកទៅកាន់ទីស្នាក់ការនគរបាលប៉ុស្តិ៍ ធ្វើការសាកសួរ ពីមូលហេតុ ដែលរូប នាងមកប្រព្រឹត្តសកម្មភាពឆ្កួតៗ បែបនេះ ។
នៅចំពោះមុខ សមត្ថកិច្ចក្មេងស្រីនេះ មិនបាននិយាយស្តីអ្វីពាក់ព័ន្ធ នឹងការរស់នៅរបស់នាងទេ ប៉ុន្តែគ្រាន់ តែនាងនិយាយ ជាលក្ខណៈលេងសើចថា មូលហេតុដែលនាងរើសដុំឥដ្ឋគេឯងបែបនេះ ព្រោះតែចង់ឲ្យសមត្ថកិច្ច មកចាប់ខ្លួន រូបនាងយក ទៅប៉ុស្តិ៍តែប៉ុណ្តោះ ។ ទោះបីជានាងនិយាយបែបនេះសមត្ថកិច្ចនគរបាលប៉ុស្តិ៍មូលដ្ឋាន បាន សន្និដ្ឋានថា មូលហេតុដែល រូបនាងមកប្រព្រឹត្តនៅទង្វើឆ្កួតៗបែបនេះ គឺដោយសាររូបនាងសរសៃប្រសាទ នឹងទំនងជារូបនាងញៀនថ្នាំខ្លាំងពេក ធ្វើឲ្យ វង្វេងស្មារតី ក្លាយជាមនុស្សឡប់សតិ ដើរធ្វើនេះធ្វើនោះឲ្យមនុស្សម្នា ដើម្បីឲ្យខ្លាចញញើតនឹងសកម្មភាពរបស់គេ ។
តែទោះជាយ៉ាងនេះក្តី ជុំវិញករណីក្មេងស្រីរូបស្រល់ ខាងលើនេះ សមត្ថកិច្ចបានអំពាវនាវ ដល់បងប្អូនប្រជាពលរដ្ឋទាំង អស់ សូមគិតគូរ ចំពោះកូនៗ របស់ខ្លួនឲ្យបានល្អ ដើម្បីជៀសវាង កុំឲ្យពួកគេមកធ្លាក់ខ្លួនបែបនេះ។ ព្រោះបើ មើលទៅ ក្មេងស្រីនេះទំនងឪពុក ម្តាយមិនសូវគិតគូ ហើយបានជារូបគេលង់ខ្លួន ដើរលេងសប្បាយ ភ្លេចការរៀន សូត្រ រហូតបែក អារម្មណ៍ ដើរជក់ថ្នាំ លេងសប្បាយ ជាមួយប្រុសស្នេហ៍ វង្វេងស្មារតីភ្លេចម្តាយ លែងស្គាល់ឪពុក សាច់ញាតិ មកក្លាយ ជាមនុស្ស ដែលសង្គមស្អប់ខ្ពើម ៕
ដោយ៖ ដើមអំពិលផ្តល់សិទ្ធិដោយ៖ ដើមអំពិល