Yuri Gagarin
នៅថ្ងៃនេះកាលពី ៥០ឆ្នាំមុន ពោលគឺថ្ងៃទី ១២ ខែមេសា ឆ្នាំ១៩៦១ គឺជាថ្ងៃដ៏សំខាន់ក្នុងប្រវត្តិសាស្រ្ដនៃភពផែនដីរបស់យើង។ នៅថ្ងៃនោះ អវកាសយាននិករបស់រូស្ស៊ី (អតីតសហភាពសូវៀត) ឈ្មោះ Yuri Gagarin បានក្លាយទៅជាមនុស្សដំបូងគេបំផុតដែលបានទៅដល់ទីអវកាស ដោយការហោះហើរចំនួន ១០៨នាទីជាមួយនឹងយានអវកាស Vostok។ ចាប់ពីថ្ងៃនោះមកលោក Yuri Gagarin បានក្លាយទៅជាមនុស្សដ៏ល្បីម្នាក់នៅលើលោកយើងនេះ ដោយសារមានបណ្ដាញព័ត៌មានជាច្រើនបានចុះផ្សាយពីរូបលោក។
ក្រោយពីរូបលោក Yuri Gagarin
ឡើងទៅអវកាសបានមិនដល់មួយខែស្រួលបួលផង អវកាសយាននិកម្នាក់ទៀត គឺ Alan Shepard បានក្លាយទៅជាជនជាតិអាមេរិកដំបូងគេ ដែលបានឡើងទៅកាន់ទីអាវកាសផងដែរ។
ការប្រណាំង ប្រជែងរវាងអតីតសហភាពសូវៀត និងសហរដ្ឋអាមេរិកនៅតែបន្តលើគ្រប់វិស័យរួមទាំងការទៅកាន់ទី អវកាសនេះផង ដើម្បីបង្ហាញប្រាប់ប្រទេសដទៃទៀតពីភាពខ្លាំងរបស់ខ្លួន។ ការសហប្រតិបត្តិការជាលើកទីមួយរបស់ប្រទេសមហាអំណាចទាំងពីរលើ គម្រោងទៅកាន់ទីអវកាសបានកើតមានឡើងនៅឆ្នាំ ១៩៧៥។ ចាប់តាំងពីឆ្នាំ ១៩៩៣មក ទាំងអាមេរិក និងរូស្ស៊ី បានធ្វើការជាមួយគ្នាទៅលើគម្រោងទៅកាន់ទីអវកាសមួយចំនួន។
ងាកមកនិយាយពីលោក Yuri Gagarin ដែលជាជនទីមួយដែលបានជាន់លើទីអវកាសវិញ។ លោកបានចាប់កំណើតនៅសហភាពសូវៀតនៅឆ្នាំ ១៩៣៤ ហើយបានស្លាប់នៅឆ្នាំ ១៩៦៨ ក្នុងអាយុ ៣២ឆ្នាំដោយសារគ្រោះថ្នាក់យន្តហោះពេលគាត់កំពុងបង្ហាត់បើកយន្តហោះ ។ ការស្លាប់នេះគឺក្រោយពេលដែលគាត់ទៅដល់ទីអវកាសបាន ៧ឆ្នាំ។
ក្នុងមួយជីវិតរបស់លោក Yuri Gagarin គាត់បានទទួលនូវមេដាយកិត្តិយសជាច្រើន ហើលឈ្មោះគាត់ត្រូវបានគេចងចាំជានិច្ច។ បច្ចុប្បន្ននៅទីក្រុងមូស៊្គូ ក៏មានរូបសំណាករបស់គាត់ដែរ។
(ប្រភព៖ ខ្មែរសារិកា)