នារីម្នាក់ និងបុរសម្នាក់រងវាយប្រហារកាលពីយប់ថ្ងៃច័ន្ទ ខណៈដែលពួកគេកំពុងអង្គុយលេងនៅបរិវេណសាលារៀន ស្រុកស្ទឹងត្រង់ ខេត្តកំពង់ចាម។ សម្មត្ថកិច្ចបាននិយាយថា យើងមិនទាន់ដឹងពីមូលហេតុនៃហេតុការណ៍នេះនៅឡើយ។
យោងទៅតាមរបាយការណ៍ របស់សម្មត្ថកិច្ចស្រុកស្ទឹងត្រង់បានឲ្យដឹងថា នារីម្នាក់ត្រូវបានគេស្គាល់ឈ្មោះថា ហៃ ធាវីន អាយុ ២៤ ឆ្នាំជាគ្រូបង្រៀនភាសាកូរ៉េ ខណៈដែលបុរសត្រូវបានគេស្គាល់ថា ម៉ៅ សុខមិញ អាយុ ២១ ឆ្នាំ។
តាមរបាយការណ៍បានកត់សម្គាល់ថា ការវាយប្រហារនេះ បានកើតឡើងរវាងម៉ោង ១០ ទៅម៉ោង ១១ យប់ថ្ងៃច័ន្ទ នៅក្នុងបរិវេណសាលាបឋមសិក្សា ឃុំព្រែកកក់ ស្រុកស្ទឹងត្រង់។ លោក សុខមិញ ត្រូវបានបញ្ជូនទៅមន្ទីរពេទ្យបង្អែកស្រុកដើម្បីព្យាបាលរបួស។
លោក ជា ធារិទ្ធ មន្រ្តីនគរបាលស្រុកស្ទឹងត្រង់ បានបញ្ជាក់ថានារីម្នាក់ត្រូវបានគេសម្លាប់ ខណៈដែលបុរសម្នាក់បានរងរបួសក្នុងស្ថានភាពយ៉ាងធ្ងន់ធ្ងរ។
លោក ធារិទ្ធ បានបន្ថែមថា ”នារីម្នាក់ត្រូវបានសម្លាប់ ហើយរាងកាយរបស់នាងស្ថិតក្នុងសភាពអាក្រាត” ។ ឥឡូវនេះនគរបាលកំពុងស៊ើបអង្កេតករណីនេះ ដូច្នេះខ្ញុំមិនអាចធ្វើអត្ថាធិប្បាយបន្ថែមបានទេ”៕
ប្រភព ៖ ខ្មែរថាម