អាចម៍ផ្កាយ 16 Psyche មានអង្កត់ផ្ចិតជិត ៣០០គីឡូម៉ែត្រ ដែលបង្កើតឡើងអំពីដែក និង nickel អាចមានផ្ទុកទឹក ឬ hydroxyl។
ក្រុមអ្នកវិទ្យាសាស្ដ្របានរកឃើញភ័ស្ដុតាងអាចជាសញ្ញារបស់ទឹកនៅលើផ្ទៃ 16 Psyche ដែលជាអាចម៍ផ្កាយលោហធាតុធំមួយ នេះបើតាមទំព័រ Nature World News ដែលបានចុះផ្សាយកាលពីថ្ងៃទី ១វិច្ឆិកាកន្លងទៅ។
អាចម៍ផ្កាយ 16 Psyche អាចមានផ្ទុកជាតិទឹក
អាចម៍ផ្កាយ 16 Psyche មានអង្កត់ផ្ចិតជិត ៣០០គីឡូម៉ែត្រ ដែលត្រូវបានបង្កើតឡើងស្ទើរតែទាំងស្រុងអំពីដែក និង nickel ។ ក្រុមអ្នកវិទ្យាសាស្ដ្រយល់ថា 16 Psyche អាចជាស្នូលដែលនៅសល់របស់កូនភពមួយដែលត្រូវបានបំផ្លាញដោយសារការប៉ះទង្គិចកាលពីរាប់ពាន់លានឆ្នាំមុន។
ការសិក្សាស្រាវជ្រាវមុននេះអំពី 16 Psyche មិនបានរកឃើញសញ្ញារបស់ទឹកនៅលើផ្ទៃអាចម៍ផ្កាយនេះ។ ប៉ុន្តែ ការពិនិត្យថ្មីៗនេះដោយកែវពង្រីកអ៊ីនហ្វ្រារ៉េដរបស់ NASA បានរកឃើញសញ្ញានៃរំហួត អាចជាទឹក ឬ hydroxyl ។
Vishnu Reddy ជំនួយការរបស់សាស្ដ្រាចារ្យប្រចាំការនៅក្នុងមន្ទីរពិសោធភព និងព្រះចន្ទ នៃសកលវិទ្យាល័យ Arizona ដែលជាអ្នកស្រាវជ្រាវអំពីអាចម៍ផ្កាយ 16 Psyche ឱ្យដឹងថា “អាចម៍ផ្កាយដែលសម្បូរដោយលោហធាតុដូចជា 16 Psyche ត្រូវបានគេយល់ថា កកើតក្នុងស្ថានភាពហួតហែង មិនមានវត្តមានរបស់ជាតិទឹក និង hydroxyl។ ដូច្នេះ យើងខ្ញុំពិតជាមានការភ្ញាក់ផ្អើលពេលរកឃើញសញ្ញានេះ”។
ក្រុមអ្នកវិទ្យាសាស្ដ្រឱ្យដឹងថា 16 Psyche គឺជាអាចម៍ផ្កាយមួយក្នុងចំណោមអាចម៍ផ្កាយធំៗបំផុតក្នុងខ្សែក្រវាត់អាចម៍ផ្កាយដែលស្ថិតនៅកណ្ដាលនៃគន្លងគោចររបស់ភពព្រះអង្គារ និងភពព្រហស្បតិ៍។ អាចម៍ផ្កាយទាំងនេះ គឺជាបំណែកដែលនៅសល់ពីការកកើតរបស់ប្រព័ន្ធព្រះអាទិត្យ។ ជាទូទៅ ពួកវារួមមានពីរប្រភេទ គឺអាចម៍ផ្កាយដែលសម្បូរ silicate និងអាចម៍ផ្កាយសម្បូរ carbon ជាមួយនឹងបណ្ដាធាតុដែលងាយនឹងហួត។ ករណីដូចអាចម៍ផ្កាយ Psyche គឺកម្រមាន ដូច្នេះ អ្នកវិទ្យាសាស្ដ្រកំពុងតែសិក្សាស្រាវជ្រាវដើម្បីរកឱ្យឃើញវិធីដែលវាកកើត។
អ្នកវិទ្យាសាស្ដ្រមិនទាន់អាចដឹងបាននូវប្រភពទឹកនៅលើអាចម៍ផ្កាយ 16 Psyche ។ ប៉ុន្តែ មានការលើកឡើងថា ទឹកអាចមានប្រភពមកពីបណ្ដាអាចម៍ផ្កាយ carbon ដែលប៉ះទង្គិចនឹង 16 Psyche។ ក្រៅពីនេះ hydroxyl អាចកើតឡើងនៅពេលខ្យល់ព្រះអាទិត្យប៉ះទៅនឹងធាតុរ៉ែ silicate នៅលើផ្ទៃរបស់ 16 Psyche។
NASA កំពុងតែពិចារណាលើគម្រោងសិក្សាស្រាវជ្រាវ 16 Psyche ដើម្បីជួយដល់អ្នកវិទ្យាសាស្ដ្រក្នុងការកំណត់ឱ្យដឹងថា សញ្ញាដែលរកឃើញនៅលើ 16 Psyche គឺជាទឹក ឬជា hydroxyl៕
ប្រែសម្រួល ៖ តារាប្រភព ៖ natureworldnews