រដ្ឋមន្រ្តីការបរទេសអាស៊ានបានបង្ហាញនូវការប្តេជ្ញាចិត្តរបស់ពួកគេក្នុងការជួយ និងគាំទ្រប្រទេសជប៉ុន និងប្រជាជនជប៉ុនក្នុងកិច្ចប្រឹងប្រែងស្តារ និងកសាងប្រទេសឡើងវិញបន្ទាប់ពីគ្រោះរញ្ជូយដី និងរលកយក្សស៊ូណាមិមហាប្រល័យ ដែលបានសម្លាប់មនុស្សរាប់ពាន់អ្នក និងធ្វើឲ្យប្រជាជនរាប់ម៉ឺននាក់បាត់ទីជម្រកកាលពីខែមុន។
ពួកគេបាននិយាយថា អាស៊ាននឹងតបស្នងដល់ប្រទេសជប៉ុនវិញនូវអ្វីដែលពួកគេពណ៌នាថា ការឧបត្ថម្ភដ៏សប្បុរសរបស់ជប៉ុនចំពោះការអភិវឌ្ឍនៃប្រទេសអាស៊ានទាំង១០ ក្នុងពេលកន្លងមក។
រដ្ឋមន្រ្តីការបរទេសអាស៊ាន លោក ម៉ារទី ណាតាឡេហ្គាវ៉ា បានមានប្រសាសន៍ថា សមាជិកអាស៊ានទាំង១០ បានជួយជប៉ុនជាលក្ខបុគ្គលហើយ ដូចជាការបញ្ជូនថវិកា និងក្រុមជួយសង្រ្គោះដល់ប្រទេសជប៉ុនជាដើម។
លោកណាតាឡេហ្គាវ៉ា បានប្រាប់អ្នកសារព័ត៌មានថា៖ �អ្វីដែលយើងបានធ្វើនៅថ្ងៃនេះ គឺពីរបៀបដើម្បីបង្កើតកិច្ចសហប្រតិបត្តិការក្នុងចំណោមសមាជិកអាស៊ាន។ ដូច្នេះអ្វីដែលជាជំនួយជាទ្វេភាគីនោះ ឥឡូវនេះពួកគេអាចបង្កើតជាការជួយជាបន្តមិនដាច់ និងជំនួយថ្នាក់តំបន់�។
ថ្លែងទៅកាន់ពិធីបើកកិច្ចប្រជុំអាស៊ាន-ជប៉ុន ដែលផ្តួចផ្តើមដោយឥណ្ឌូនេស៊ីនៅឯលេខាធិការដ្ឋានអាស៊ាន នៅក្នុងក្រុងហ្សាការតា កាលពីថ្ងៃសៅរ៍ ទី៩ មេសា ប្រធានាធិបតី លោក ស៊ូស៊ីឡូ បាំបាំង យុទ្ធោយ៉ូណូ ក៏បានលើកទឹកចិត្តឲ្យពង្រឹងកិច្ចសហប្រតិបត្តិការនេះ និងសាមគ្គីភាពដើម្បីជួយដល់ជប៉ុន។
លោកបានថ្លែងថា អាស៊ីភាគអាគ្នេយ៍ និងជប៉ុន ដែលងាយនឹងរងគ្រោះដោយមហន្តរាយធម្មជាតិ ត្រូវតែធ្វើកិច្ចសហប្រតិបត្តិការ និងពង្រឹងសាមគ្គីភាពជាមួយគ្នាទៅវិញទៅមក។
បន្ទាប់ពីកិច្ចប្រជុំរយៈពេល៤ម៉ោងរួចមក លោកណាតាឡេហ្គាវ៉ាបានថ្លែងថា ក្រុមរដ្ឋមន្រ្តីការបរទេសអាស៊ាន និងក្រុមអ្នកតំណាងរបស់ពួកគេ បានសម្តែងការសមានទុក្ខ សាមគ្គីភាព និងការគាំទ្ររបស់ពួកគេចំពោះរដ្ឋាភិបាល និងពលរដ្ឋជប៉ុននៅក្នុងកិច្ចប្រឹងប្រែងងើបឡើងវិញ និងកសាងប្រទេសឡើងវិញ។
ឯកអគ្គរដ្ឋទូតសិង្ហបុរីទទួលបន្ទុកកិច្ចការរួម លោកជីវ តាយស៊ូ បានថ្លែងថា៖�ខ្ញុំអាចមើលឃើញថា រដ្ឋមន្រ្តីការបរទេសជប៉ុន លោកតាកិអាគី ម៉ាត់ស៊ូម៉ូតូ មានការខ្វាយខ្វល់ជាខ្លាំង។ នៅពេលដែលវាគ្មិនម្នាក់ៗបានថ្លែង ខ្ញុំបានឃើញលោក យកកន្សែងជូតទឹកភ្នែក។ យើងអាចសំដែងសមានទុក្ខ។ ប៉ុន្តែមានតែពលរដ្ឋជប៉ុនទេ ទើបដឹងពីអារម្មណ៍ក្រៀមក្រំពិតប្រាកដ�។
រដ្ឋមន្រ្តីការបរទេសហ្វីលីពីន លោក អាល់បឺត រ៉ូសារីយ៉ូ ថ្លែងថា លោក ជឿថា ជប៉ុន �នឹងងើបឡើង ហើយអាស៊ាន នឹងងើបជាមួយនឹងជប៉ុនផងដែរ�។
អគ្គលេខាធិការអាស៊ាន លោក សូរិន្ទ ពិតសុវណ្ណ បាននិយាយថា វាដល់ពេលដែលបណ្តាប្រទេសនៅអាស៊ានតបស្នងវិញនូវអ្វីដែលជប៉ុន បានជួយក្នុងការអភិវឌ្ឍនៅក្នុងប្លុកនេះ
(ប្រភព៖ ភ្នំពេញប៉ុស្តិ៍)