ផ្នូរបុរាណចំឡែកមួយត្រូវបានអ្នកបុរាណវិទូរកឃើញ ហើយផ្នូរនេះបានកប់នូវមនុស្សបុរាណខ្ទើយដំបូងគេបំផុតក្នុងលោក។ ឆ្អឹងមនុស្សដែលរស់នៅក្នុងរូងភ្នំបុរាណនេះ ត្រូវបានគេរកឃើញនៅក្រៅទីក្រុង ប្រាក នៃសាធារណរដ្ឋឆែក។ អ្នកបុរាណវិទូទាំងនោះបានសន្និដ្ឋានថា ឆ្អឹងនេះ ជាឆ្អឹងមនុស្សដែលស្រឡាញ់ភេទដូចគ្នា។
កំឡុងពេលនៃយុគលោហៈកាលពី ៥០០០ឆ្នាំមុន បុរសដែលស្លាប់ត្រូវបានគេកប់ដោយដាក់ក្បាលទៅទិសខាងលិច ហើយមានអាវុធ និងកាំបិតកប់ជាមួយផងដែរ។ ប៉ុន្ដែបុរាណវិទូរបស់សាធារណរដ្ឋឆែក បាននិយាយថា ឆ្អឹងដែលគេប្រទះឃើញលើកនេះ គឺខុសប្លែកពីលើកណាទាំងអស់ ព្រោះសាកសពត្រូវបានគេ
បែរក្បាលទៅខាងកើត ដោយកប់ជាមួយនឹងសម្ភារៈក្នុងផ្ទះមួយចំនួនដូចជា ផ្ដិលទឹក ឆ្នាំងបាយ និងសម្ភារៈមួយចំនួនទៀត ដែលស្ទើរតែទាំងអស់នៃសម្ភារៈទាំងនោះ គឺដូចទៅនឹងអ្វីដែលគេបញ្ចុះជាមួយសពមនុស្សស្រីក្នុងតំបន់នេះនាពេលនោះ។
បុរាណវិទូម្នាក់ឈ្មោះ Kamila Remisova Vesinova បានប្រាប់សារព័ត៌មានថា យោងតាមប្រវត្តិសាស្រ្ដ បានឲ្យយើងដឹងថាមនុស្សនៅសម័យនោះ មានការបញ្ចុះសពតឹងតែង និងម៉ត់ចត់ណាស់ ដូច្នេះវាពិតជាមិនអាចមានកំហុសកើតឡើងការកំណត់ទីតាំងសាកសពបានទេ។ ដូច្នេះវាពិតជាត្រឹមត្រូវណាស់ ដែលយើងសន្និដ្ឋានបានថា ឆ្អឹងដែលគេប្រទះឃើញពេលនេះ ជាឆ្អឹងរបស់បុរសដែលស្រឡាញ់បុរសដូចគ្នា ឬបុរសដែលស្រឡាញ់បានទាំងពីរភេទ គឺស្រីក៏បានប្រុសក៏បាន ដែលភាសាសាមញ្ញហៅថាខ្ទើយនោះ។
ក្រុមអ្នកស្រាវជ្រាវដែលជាបុរាណវិទូក្រុមដដែលនេះ ក៏បានថ្លែងទៀតថា ពួកគេធ្លាប់បានឃើញផ្នូររបស់ស្រ្ដីដែលជាមេកន្រ្ទាញ ត្រូវបានគេបញ្ចុះជាមួយនឹងសម្ភារៈមនុស្សប្រុស ដូចជាអាវុធជាដើម ប៉ុន្ដែមិនដែលប្រទះឃើញផ្នូររបស់បុរសដែលបញ្ចុះតាមរបៀបស្រ្ដីដូច្នេះឡើយ។ បុរាណវិទូម្នាក់ទៀត គឺ Katerian Semradova បានប្រាប់ថា របកគំហើញនេះ គឺជារបកគំហើញមួយដ៏ថ្មីបំផុត ដោយសារតែអាចរកឃើញផ្នូររបស់មនុស្សភេទទី៣សម័យបុរាណ។
អ្នកបុរាណវិទូក៏បានរកឃើញឆ្នាំងរាងមូលមួយនៅជិតសាកសពបុរសខ្ទើយម្នាក់នេះផងដែរ ដែលវាជាវត្ថុដែលគេតែងតែបញ្ចុះជាមួយស្រ្ដី។
(ប្រភព: Khmersakira)